پیرس (نیوز ڈیسک) یورپین فٹ بال چیمپئن شپ 2016ءمیں سستا ترین ٹکٹ 25 اور سب سے مہنگا ٹکٹ 895 یوروز میں فروخت ہو گا۔ یورو 2016ءمنتظمین نے میگا ایونٹ کیلئے ٹکٹوں کی قیمتوں کا اعلان کر دیا جس کے تحت شائقین فٹ بال کو سب سے سستا ٹکٹ 25 یوروز میں ملے گا جبکہ فائنل میچ کا ٹکٹ مہنگا ترین ہو گا جس کی قیمت 895 یوروز رکھی گئی ہے۔ آرگنائزنگ کمیٹی کے چیئرمین جیکس لیمبرٹ کے مطابق ہم نے میگا ایونٹ کے ابتدائی 43 میچز کیلئے ٹکٹوں کی قیمت کم رکھی ہے اور تقریباً ڈھائی لاکھ کے قریب شائقین 25 یوروز میں ٹکٹیں خریدیں گے۔ پہلے آئیے اور پہلے پائیے کی پالیسی کے تحت ٹکٹوں کی فروخت کا عمل 10 جون سے 10 جولائی تک جاری رہے گا جس میں ایک ملین ٹکٹیں فروخت ہوں گی۔ دسمبر میں یوئیفا چیمپئن شپ ڈراز کے بعد اضافی 8 لاکھ ٹکٹیں ایونٹ کیلئے کوالیفائی کرنے والی ٹیموں کے شائقین کو فروخت کی جائیں گی جبکہ 20 ہزار سیٹیں فرانس کے غریب بچوں کیلئے رکھی جائیں گی۔ ٹورنامنٹ کے دوران گراﺅنڈ میں کوئی ٹکٹ فروخت نہیں کیا جائے گا۔ واضح رہے کہ ایونٹ 10 جون سے 10 جولائی 2016ءتک فرانس میں کھیلا جائے گا۔