کراچی(نیوز ڈیسک) ورلڈکپ 2015 میں شکست کے بعد قائم کردہ کمیٹی نے 2019 کیلیے ”تجاویز“ پیش کردیں، جب تک اس کی رپورٹ تیار ہوئی ٹیم بنگلہ دیش سے بھی ون ڈے سیریز میں کلین سوئپ کا شکار ہو چکی تھی۔
تفصیلات کے مطابق آسٹریلیا اور نیوزی لینڈ میں منعقدہ میگا ایونٹ میں قومی کرکٹ ٹیم کی ناقص کارکردگی پر پی سی بی نے5رکنی جائزہ کمیٹی تشکیل دی، اس میں شہریارخان، نجم سیٹھی، سبحان احمد، اقبال قاسم اور وسیم باری شامل تھے، کمیٹی کی سنجیدگی کا یہ عالم تھا کہ طویل عرصے تک کوئی اجلاس ہی نہیں ہوا، پھر جب ارکان پہلی بار اکھٹے ہوئے تو خاصا وقت گذر چکا تھا، چیئرمین نے محسوس کر لیا کہ اب میگا ایونٹ میں شکست کے اسباب پر بحث سے کوئی فائدہ نہیں ہو گا۔
انھوں نے اس وقت سابق کرکٹرز اقبال قاسم اور وسیم باری کو یہ ٹاسک دیا کہ اگلے ورلڈکپ میں بہتری کیلیے تجاویز پیش کریں۔ ذرائع نے بتایا کہ دونوں نے اپنی رپورٹ تیار کر کے شہریارخان کو ارسال کر دی اور وہ بھارت سے واپسی پر اس کا جائزہ لیں گے، اگر انھوں نے محسوس کیا تو دونوں سابق چیف سلیکٹرز کو لاہور بلا کر اس حوالے سے تبادلہ خیال کریں گے۔ ذرائع نے مزید بتایا کہ اقبال قاسم اور وسیم باری نے ورلڈکپ 2019میں بہتر پرفارمنس کیلیے کھلاڑیوں کی فٹنس کا معیار بہتر بنانے پر زور دیا ہے، انھوں نے تجویز دی کہ سلیکشن میں تسلسل رکھا جائے۔
فیلڈنگ میں بہتری کے ساتھ ٹیم کیلیے کھیلنے کا کلچر بھی فروغ دینا ضروری ہے۔ انھوں نے بیٹنگ ا?رڈر ٹھیک رکھنے کا مشورہ دینے کے ساتھ بیک اپ کھلاڑیوں کی تیاری پر بھی زور دیا۔ یاد رہے کہ مصباح الحق کی زیرقیادت پاکستانی ٹیم کو کوارٹر فائنل میں آسٹریلیا نے باآسانی شکست دی تھی، ایونٹ کے بعد کپتان ون ڈے کرکٹ سے ریٹائر ہو گئے تھے۔