نئی دلی(نیوزڈیسک) بھارتی حکومت نے متحدہ عرب امارات میں ہونے والی پاکستان اور بھارت کے درمیان ہونے والی کرکٹ سیریزکی منظوری دے دی ہے۔بھارتی میڈیا کے مطابق بھارتی حکومت نے پاک بھارت کرکٹ سیریز کی منظوری پاکستان کرکٹ بورڈ کے چیر مین شہر یار خان کی بھارتی وزیر خزانہ سے ملاقات کے بعد دی۔ میڈیا کے مطابق ملاقات میں بھارتی وزیر خزانہ نے پاکستان کرکٹ بورڈ کے چیرمین شہریار خان کو بتایا کہ حکومت کو پاک بھارت کرکٹ سیریز پر کوئی اعتراض نہیں۔دوسری جانب بھارتی وزیراعظم نریندر مودی نے گزشتہ روز حکمراں جماعت بھارتیہ جنتا پارٹی (بی جے پی) کی پارلیمانی پارٹی کے اجلاس میں پاکستان سے تعلقات کو بہتر بنانے کے لیے کرکٹ ڈپلومیسی شروع کرنے کا اعلان کیا۔ بھارتی وزیراعظم کا کہنا تھا کہ ان کی حکومت نے پاک بھارت کرکٹ سیریز شروع کرنے کا فیصلہ کیا ہے وہ پاکستان کے ساتھ اس لیے کرکٹ سیریز شروع کرنا چاہتے ہیں تاکہ دونوں ملکوں کے درمیان تعلقات بہتر ہوں۔واضح رہے کہ پاکستان رواں سال دسمبر میں ہونے والی سیریز کی میزبانی متحدہ عرب امارات کے میدانوں میں کرے گا، سیریز میں 2 ٹیسٹ، 5 ایک روزہ اور3 ٹوئنٹی میچز کھیلے جائیں گے۔