لندن(نیوزڈیسک) انگلینڈ کے سابق کپتان اور بورڈ کے نئے ڈائریکٹر کرکٹ اینڈریو اسٹراس نے اسٹار بلے باز کیون پیٹرسن کی شاندار کارکردگی کے باوجود انہیں ٹیم میں منتخب نہ کرنے فیصلہ کیا ہے۔کیون پیٹرنس نے پیر کو کاو¿نٹی چیمپیئن شپ میں سرے کی نمائندگی کرتے ہوئے لیسٹر شائر کے خلاف شاندار بلے بازی کا مظاہرہ کرتے ہوئے ٹرپل سنچری مکمل کی۔انہوں نے 373 گیندوں پر 34 چوکوں اور 14 چھکوں کی مدد سے ناقابل شکست 355 رنز کی اننگکھیلی جس کی بدولت ان کی ٹیم نے 557 رنز کا مجموعہ بنایا۔تاہم اس شاندار کارکردگی کے باوجود ان کے لیے انگلش کرکٹ کے دروازے نہ کھل سکے اور انگلینڈ کے نئے ڈائریکٹر کرکٹ نے اس سیزن میں پیٹرسن کی ٹیم میں واپسی کے امکان کو رد کرتے ہوئے کہا ہے کہ پیٹرسن پر اعتماد نہیں کر سکتے۔واضح رہے کہ ماضی میں پیٹرسن کے اپنے سابق کپتان اینڈریو اسٹراس کے ساتھ تعلقات کافی کشیدہ رہے یہ معاملہ اس وقت شروع ہوا تھا جب 2012 میں جنوبی افریقہ کے خلاف سیریز کے دوران اسٹار بلے باز نے اپنے کپتان کے اشتعال انگیز ٹیکسٹ میسیج پروٹیز ٹیم کو بھیجے تھے۔پھر گزشتہ سال ایشز سیریز میں آسٹریلیا کے خلاف 5-0 سے شکست کے بعد ان پر انگلش ٹیم کے دروازے بند کر دیے گئے تھے جس کے بعد یہ قیاس آرائیاں کی جا رہی تھیں کہ شاید وہ دوبارہ کبھی انگلینڈ کے لیے نہ کھیل سکیں۔لیکن تمام طرز کی کرکٹ میں انگلینڈ کے لیے سب سے زیادہ رنز بنانے والے بلے باز کو انگلس کرکٹ بورڈ کے چیئرمین کولن گریوز نے کاو¿نٹی کرکٹ کھیل کر اپنی فارم بحال اور اپنی اہلیت ثابت کرنے کا مشورہ دیا جس پر عمل کرتے ہوئے انہوں نے سیزن میں شاندار فارم دکھائی اور ٹرپل سنچری بھی بنا ڈالی لیکن اس کے باوجود اسٹراس اس کارکردگی سے متاثر نہیں ہو سکے۔اسٹراس نے میڈیا سے بطور کرکٹ ڈائریکٹر پہلی پریس بریفنگ میں کہا کہ اصل مسئلہ بھروسے کا ہے اور ٹیم کے مفاد میں بہتر یہی ہے کہ پیٹرسن اس میں شامل نہ ہوں۔اسٹراس نے کہا کہ پیٹرسن کی صلاحیتوں پر کسی کو کوئی شبہ نہیں، ان کا ریکارڈ شاندار ہے اور انہیں اس پر فخر ہونا چاہیے لیکن ہر گزرتے وقت کے ساتھ ان کے اور ای سی بی کے کے درمیان اعتماد میں کمی ہوئی ہے جبکہ میرے اور پیٹرسن کے درمیان بھی اعتماد کا بڑا مسئلہ ہے۔’ہم ان کے کرکٹ کھیلنے پر پابندی عائد نہیں کر رہے لیکن وہ اس سال گرمیوں کے سیزن میں ہمارے منصوبے کا حصہ نہیں ہیں۔اینڈریو اسٹراس نے اس موقع پر کہا کہ عہدے سے برطرف کیے جانے والے انگلینڈ کوچ پیٹر مورس کی جگہ سابق آسٹریلین فاسٹ باولر جیسن گلیسپی اس عہدے کے لیے مضبوط امیدوار ہیں۔