لاہور (نیوزڈیسک)رواں ماہ پاکستان کا دورہ کرنے والی زمبابوے کی کرکٹ ٹیم کو ٹھہرانے کے مقام میں تبدیلی کر دی گئی ، مہمان ٹیم کے کھلاڑی اب نیشنل کرکٹ اکیڈمی کی بجائے لاہور کے فائیو سٹار ہوٹل میں قیام کریں گے۔ نجی ٹی وی کے مطابق سکیورٹی کے پیش نظر 19مئی سے پاکستان کا دورہ کرنے والی زمبابوےن ٹیم کے کھلاڑیوں کو قذافی اسٹیدیم سے ملحقہ نیشنل کرکٹ اکیڈمی میں ٹھہرانے کےلئے انتظامات کئے گئے تھے ۔ تاہم اب فیصلہ کیا گیا ہے کہ زمبابوے کرکٹ ٹیم کے کھلاڑی لاہور کے فائیو سٹار ہوٹل میں قیام کرینگے جسکے لئے سکیورٹی اداروں نے بھی کلیئرنس دیدی ہے ۔ زمبابوے کرکٹ ٹیم 19مئی سے یکم جون تک لاہور میں قیام رہے گی جس کے لئے زمبابوے بورڈ کو فول پروف سکیورٹی کی یقین دہانی کرائی گئی ہے اور زمبابوے سکیورٹی ٹیم بھی انتظامات پر اطمینان کا اظہار کر چکی ہے۔