کیرالہ(نیوز ڈیسک) جنسی طور پر ہراساں کئے جانے پر بھارت کی چار خواتین اتھلیٹس نے خود کشی کی کوشش کی جن میں سے ایک ہلاک ہو گئی جبکہ تین کو بچا لیا گیا ہے، بچ جانے والی اتھلیٹس میں سے ایک کی حالت نازک بتائی جاتی ہے۔ واقعہ بدھ کو بھارتی ریاست کیرالہ کے سپورٹس اتھارٹی آف انڈیا کے ہاسٹل میں پیش آیا۔ پولیس کے مطابق چاروں کم عمر لڑکیاں سینئر اتھلیٹس اور کوچز کی طرف سے جنسی طور پر ہراساں کئے جانے پر خوفزدہ اور مایوس تھیں اور انہوں نے یہ انتہائی اقدام اٹھایا ہے۔ بھارتی حکومت نے معاملے کی انکوائری کا حکم دیدیا ہے۔ یہ واقعہ بدھ کی سہ پہر پیش آیا جب ان لڑکیوں نے ایک زہریلا پھل کھا کر اپنی جان لینے کی کوشش کی، شام ساڑھے 7 بجے اس کیس کا انداز ہوا جس کے بعد انکوائری شروع کر دی گئی ہے۔
ہلاک ہونے والی اپارنا کی والدہ نے پولیس کو بیان دیا کہ چند روز قبل ان کی بیٹی جب گھر آئی تو وہ پریشان تھی اور اس نے سینئرز اور کوچنگ سٹاف کے رویئے کی شکایت کی تھی۔ انہوں نے بتایا کہ خود کشی سے کچھ دیر قبل بھی اپارنا نے ان سے فون پر بات کی تھی اور کہا تھا کہ اسے بخار ہے۔
سٹیٹ سپورٹس منسٹر تھرو رنچھوڑ رادھا کرشنن نے جائے وقوعہ کا دورہ کیا اور کہا کہ واقعہ کی تفصیلی انکوائری کرائی جائے گی۔ سپورٹس سینٹر کو عارضی طور پر بند کر دیا گیا ہے جبکہ امکان ہے کہ جلد ہی اس معاملے میں گرفتاریاں بھی شروع کر دی جائیں گی۔