لندن(نیوزڈیسک) پاکستانی نڑاد برطانوی باکسر عامر خان کا کہنا ہے کہ امریکی باکسر مے ویدر کے منیجر نے ان سے فائٹ کے لئے رابطہ کیا ہے تاہم رمضان المبارک کے بعد مے ویدر کے ساتھ رنگ میں اترنے کو تیار ہوں۔دنیا کے سب سے مہنگی ترین فائٹ جیتنے والے امریکی باکسر مے ویدر کو عامر خان کئی بار رنگ میں سامنا کرنے کا چیلنج کر چکے ہیں لیکن ان کی جانب سے ہمیشہ تاخیری حربے اختیار کئے گئے لیکن اس بار مے ویدر کے منیجر نے پاکستانی نژاد باکسرسے رابطہ کیا اور درخواست کی کہ 38 سالہ باکسر رواں سال دسمبر میں باکسنگ کو خیرباد کہہ رہے ہیں اور اس سے قبل وہ اپنے کیرئیر کی آخری فائٹ ان کے ساتھ چاہتے ہیں جس پرعامر خان نے امریکی باکسر کے منیجر کو مثبت جواب دیا اور کہا کہ وہ بھی مے ویدر کے ساتھ رنگ میں مقابلہ کرنا چاہتے ہیں تاہم 30 مئی کو سابق ویلٹرویٹ ورلڈ چیمپئن کرس الجیری کے ساتھ ان کی فائٹ شیڈول ہے جس کے بعد رمضان المبارک کے باعث وہ فائٹ نہیں کرسکتے۔عامرخان نے کہا کہ مے ویدرکے ساتھ رواں سال کے اختتام یا 2016 کے شروع میں فائٹ کے لئے تیار ہوں اور وہ جہاں کہیں گے وہیں رنگ میں اتریں گے لیکن مے ویدر کو سمجھنا چاہیئے کہ وہ اچھے باکسر ہیں لیکن وہ تیز رفتار مکے جڑنے کی صلاحیت نہیں رکھتے اور زور آور مکے برسانے والے باکسر کا نام عامرخان ہے۔واضح رہے پاکستانی نڑاد برطانوی باکسر عامر خان اپنے کیرئیر میں 33 مقابلے کھیل چکے ہیں جس میں وہ 30 مرتبہ کامیاب رہے جب کہ گزشتہ سال دسمبر میں انہوں نے مے ویدر کو واضح طور پر شکست دی تھی۔