کراچی (نیوز ڈیسک)پاکستان کرکٹ ٹیم کے سابق کپتان اور چیف سلیکٹر معین خان نے کہا ہے کہ کسینو اسکینڈل سے میری عزت پر حرف آیا،میڈیا نے واقعہ کو بڑھا چڑھا کر پیش کر کے رہی سہی کسر نکال دی، پاکستان واپس بلانے سے غلط پیغام گیا، بور ڈ کو مجھ پر اعتماد کر نا چاہیے تھا ایک انٹرویو میں معین خان نے کہاکہ بلاشبہ کسینو اسکینڈل سے ان کی بطور ایک سابق کپتان اور کھلاڑی عزت اور رتبہ پر حرف آیا۔اس واقعہ نے میرے اور میرے خاندان کیلئے مسائل کھڑے کیے تاہم میڈیا نے جس طرح اس واقعہ کو منفی انداز میں بڑھا چڑھا کر پیش کیا یہ میرے لیے بہت مایوس کن تھا کیونکہ میرا پورا کرکٹ کیرئیر بے داغ رہا ہے۔وطن واپس بلانے کے حوالے سے سوال کے جواب میں معین خان نے کہاکہ پی سی بی نے جلد بازی میں فیصلے کیے ایک کسینو میں جا کر کھانا کھانا اور دوستوں اور مداحوں کے ساتھ تصاویر بنوانا کوئی جرم نہیں معاملہ اتنا بڑا نہیں تھا جتنا اسے بڑھا دیا گیا۔بورڈ نے معاملہ کو درست انداز میں ہینڈل نہیں کیا، مجھے پاکستان واپس بلانے سے غلط پیغام گیاانہیں مجھ پر اعتماد کرنا چاہیے تھا ۔