اینٹیگا(نیوز ڈیسک) ویسٹ انڈیز نے انگلینڈ کے خلاف پہلے ٹیسٹ میچ کےلئے 14 رکنی سکواڈ کا اعلان کر دیا ہے، لیگ سپنر دیویندرا بشو کی ٹیم میں واپسی ہوئی ہے، اپریل 2012 میں انہوں نے آخری بار ویسٹ انڈیز کی جانب سے ٹیسٹ کھیلا تھا۔ 21 سالہ نوجوان وکٹ کیپر بیٹسمین شائی ہوپ اور فاسٹ باﺅلر کارلوس براتھویٹ کو پہلی بار ٹیسٹ سکواڈ کا حصہ بنایا گیا ہے۔ کارلوس براتھویٹ ون ڈے اور ٹی 20 میں ویسٹ انڈیز کی نمائندگی کر چکے ہیں۔ ویسٹ انڈیز کرکٹ بورڈ کی سلیکشن کمیٹی کی جانب سے اعلان کردہ سکواڈ میں دنیش رامدین (کپتان)، کریگ براتھویٹ (نائب کپتان)، سلیمان بین، دیویندرا بشو، جرمائن بلیک ووڈ، کالوس براتھویٹ، ڈیرن براوو، شیونارائن چندرپال، جیسن ہولڈر، شائی ہوپ، کیمار روچ، مارلون سیموئلز، ڈیون سمتھ اور جیروم ٹیلر شامل ہیں۔ واضح رہے کہ ویسٹ انڈیز اور انگلینڈ کی کرکٹ ٹیموں کے درمیان تین ٹیسٹ میچز پر مشتمل سیریز کا پہلا ٹیسٹ (کل) پیر سے اینٹیگا میں شروع ہوگا۔