لاہور (نیوز ڈیسک) پاکستان کرکٹ بورڈ (پی سی بی) کے چیئرمین شہریار خان نے کہا ہے کہ بھارتی کرکٹ ٹیم پاکستان کا دورہ نہیں کر رہی اور 2 سال سے پہلے اس کا خواب بھی نہیں دیکھا جا سکتا۔
لاہور میں میڈیا سے بات کرتے ہوئے چیئرمین پی سی بی کا کہنا تھا کہ پاکستان میں عالمی کرکٹ کی بحالی کیلئے کوشاں ہیں اور اس مقصد کیلئے مختلف ممالک کے کرکٹ بورڈز سے بات چیت بھی جاری ہے جبکہ آئندہ ماہ زمبابوے پاکستان کا دورہ کرنے کے لئے تیار ہے۔ ان کا کہنا تھا کہ زمبابوین کرکٹ بورڈ پر واضح کر دیا ہے کہ مئی میں گرمی کی شدت زیادہ ہوتی ہے، اگر وہ برداشت کر سکتے ہیں تو آ جائیں تاہم ابھی زمبابوین بورڈ کی جانب سے جواب موصول نہیں ہوا۔
انہوں نے کہا کہ بھارت کو 2 سال تک پاکستان آنے کی دعوت نہیں دی جاسکتی اور فی الحال روایتی حریف کا متحدہ عرب امارات میں آ کر کھیل لینا ہی بھی بڑی بات ہے۔