اسلام آباد (مانیٹرنگ ڈیسک) پتھروں کے دور سے نکلنے والا انسان آج کے اس تیز رفتار دور میں داخل ہو گیا مگر تصوراتی دنیامیں رہنے والے آج بھی اسی دنیا میں رہنا پسند کرتے ہیں ۔ معروف بھارتی میڈیا کی رپور ٹ کے مطابق بھارت کی شمالی ریاست اتر اکھنڈ کے حکام نے ایسی ہی ’دانائی‘ کا ثبوت دیتے ہوئے اس جادوئی بوٹی کی تلاش شروع کردی ہے جسے ہندومت کی قدیم کتاب رامائن میں ’مردے کو زندہ کردینے والی بوٹی‘ بتایا گیا ہے۔
رپورٹ کے مطابق ریاست اتراکھنڈ کے حکام چین کی سرحد کے ساتھ ہمالیہ کے پہاڑوں میں ’’سنجیونی بوٹی‘‘ کی تلاش پر 25 کروڑ بھارتی روپے (تقریباً 40 کروڑ پاکستانی روپے) خرچ کرنے کی تیاری کرچکی ہے۔ اگرچہ طب جدید کے ماہر سائنسدان بارہا اس خام خیالی کو رد کرچکے ہیں کہ دنیا میں کسی ایسی بوٹی کا وجود ہے جو زندگی لوٹاسکتی ہو، مگر بھارتی دانشمندوں کو کوئی کیسے سمجھائے۔ ریاست اتراکھنڈ کے وزیر برائے متبادل ادویات سرندرا سنگھ کا کہنا تھا کہ ’’ہمیں کوشش کرنا ہی ہوگی اور یہ کوشش ضائع نہیں جائے گی۔ اگر ہم پرعزم رہے تو یقیناًاسے تلاش کر ہی لیں گے۔‘‘