اسلام آباد (نیوز ڈیسک)پاکستان ٹیلی کمیونیکیشن اتھارٹی (پی ٹی اے) نے موبائل فون صارفین کو غیر ضروری بیلنس کٹوتی سے بچانے کے لیے

بیلنس سیو سروس فعال کرنے کی ہدایت جاری کر دی ہے۔ یہ سہولت تمام موبائل نیٹ ورکس پر مفت دستیاب ہے۔

پی ٹی اے کے مطابق بیلنس سیو یا پی اے وائی جی بلاکر سروس صارفین کے انٹرنیٹ پیکج ختم ہونے کے بعد موبائل ڈیٹا کو خودکار طور پر بند کر دیتی ہے، جس سے بغیر اجازت بیلنس خرچ ہونے سے بچاؤ ممکن ہوتا ہے۔اتھارٹی کا کہنا ہے کہ تمام موبائل کمپنیاں اپنے صارفین کو یہ سہولت بلا معاوضہ فراہم کر رہی ہیں تاکہ ڈیٹا بنڈل ختم ہونے کے بعد اچانک بیلنس کٹنے کی شکایات کم کی جا سکیں۔

صارفین اپنے متعلقہ نیٹ ورک کے مخصوص یو ایس ایس ڈی کوڈ کے ذریعے آسانی سے یہ سروس ایکٹیویٹ کرسکتے ہیں۔ جاز صارفین *275#، زونگ صارفین *4004#، یوفون صارفین *6611# جبکہ ٹیلی نار صارفین *342# ڈائل کرکے اس سہولت سے فائدہ اٹھا سکتے ہیں۔

ترجمان پی ٹی اے نے بتایا کہ اس اقدام کا مقصد موبائل صارفین کو اضافی اخراجات سے محفوظ رکھنا اور ان کے بیلنس کو غیر ارادی کٹوتیوں سے بچانا ہے۔

پی ٹی اے نے عوام کو مشورہ دیا ہے کہ وہ فوری طور پر بیلنس سیو سروس فعال کریں تاکہ ڈیٹا پیکج ختم ہونے کے بعد خودکار انٹرنیٹ استعمال کے باعث ہونے والی غیر ضروری کٹوتیوں سے بچا جا سکے۔