لاہور (نیوز ڈیسک) بھارت کے شہر ممبئی سے تعلق رکھنے والا نوجوان اپنی محبوبہ کی تلاش میں پاکستان پہنچ گیا ‘پہنچا تو پہنچا پر راستہ بھول گیا ‘ اب جا کر پتہ چلا ہے کہ وہ تین سال سے لاپتہ نہال انصاری افغانستان کے راستوں میں کہیں گم ہو گیا او ر اس کے گم ہونے کی وجہ غیر قانونی طریقے سے پاکستان میں داخل ہونا تھا ‘ اب قانون نافذ کرنے والے اداروں کی تحویل میں ہے۔محبت کی ایک انوکھی داستان ایسی بھی ہے جو ممبئی سے شروع ہوئی اور پاکستان کی جیل میں انجام کو پہنچی۔ بھارتی نوجوان نہال انصاری کی کوہاٹ کی رہائشی پاکستانی لڑکی کے ساتھ فیس بک پر دوستی ہوئی جو محبت میں تبدیل ہو گئی۔انصاری اپنی محبوبہ کی شادی رکوانے کے لئے غیر قانونی طور پر پاکستان میں داخل ہوا لیکن محبوبہ کو ڈھونڈنے کے بجائے خود ہی لاپتہ ہو گیا، انصاری کی گمشدگی کا معمہ اس وقت حل ہوا جب اٹارنی جنرل آف پاکستان نے تصدیق کی کہ بھارتی نوجوان زیر حراست ہے اور مقدمہ کا سامنا کر رہا ہے۔انصاری کے والدین خوش ہیں کہ ان کا بیٹا زندہ ہے، وہ بہت جلد پاکستان آنا چاہتے ہیں تاکہ اپنے بیٹے کو ایک نظر دیکھ لیں اور ان کی تسلی ہو جائے۔