آپ نے دنیا میں کئی کامیاب لوگوں کو دیکھا ہو گا اور ان میں سب سے زیادہ عادت جو مشترک ہے وہ ”شکر ادا کرنا“ ہے۔ دنیا کے کامیاب ترین لوگ شکر ادا کرنے کی عادت سے مالامال ہیں ۔ اوپراوینفری، رچرڈ برنسن، ٹم فیریس اور دیگر لوگ اپنی کامیابی اور خوش رہنے کیلئے دن میں پانچ منٹ کے لئے ضرور ان تمام نعمتوں کا شکر ادا کرتے ہیں جو اللہ نے انہیں دی ہیں اور روزانہ شکر ادا کرنے سے انسان کامیابی کی طرف بڑھتا ہے اور وہ اپنے حالات سے خوش رہتا ہے۔ ہم جتنی محنت اور کوشش کر لیں پھر بھی ہماری زندگی میں کچھ لوگوں کا کردار بہت زیادہ ہوتا ہے اور اگر ہمارے خیالات کے مطابق حالات بہتر نہ ہوں تو ہم مایوس ہونے لگتے ہیں لیکن اگر ہم اللہ کا شکر ادا کرنے کی عادت اپنا لیں تو اس کا بہت مثبت اثر ہوتا ہے اور ہم مایوس نہیں ہوتے۔ ہر حال میں شکر ادا کرنے کی وجہ سے ہمیں حوصلہ ملتا ہے اور ہم مزید کوشش کرتے ہیں۔ شکر ادا کرنے سے اور لوگوں کا شکریہ ادا کرنے سے لوگوں پر آپ کے اخلاق کا اچھا اثر پڑتا ہے اور وہ آپ کے اور زیادہ قریب ہو جاتے ہیں اور آپ کی چاہنے والوں کی تعداد میں اضافہ ہوتا جاتا ہے جو ایک اچھی زندگی کی ضمانت ہے۔ شکر ادا کرنے سے ہمارے دماغ اور جسم پر بھی اچھے اثرات مرتب ہوتے ہیں اور ہم ایک خوشگوار زندگی گزارنے لگتے ہیں۔ ماہرین صحت کا کہنا ہے کہ جو لوگ شکر ادا کرتے ہیں ان دماغی حالت جو لوگ شکر ادا نہیں کرتے ان کی نسبت زیادہ قوی ہوتی ہے اور وہ زیادہ مشکل حالات میں کام کرنے سے نہیں گھبراتے۔