اسلام آباد (نیوزڈیسک)معروف میگزین فوربز نے دنیا کے امیر ترین افراد کی نئی لسٹ جاری کر دی، لسٹ کے مطابق بل گیٹس 75 ارب ڈالر دولت کے ساتھ ایک بار پھر دنیا کے امیر ترین آدمی قرار پائے ہیں۔ فیس بک اور امیزون کے بانی مالکان بھی دس امیر ترین افراد میں شامل ہیں۔معروف میگزین فوربز نے دنیا کے امیر ترین افراد کی نئی لسٹ جاری کر دی ہے۔ جس کے مطابق مائکرو سافٹ کے بانی بل گیٹس بائیس سالوں میں سترہ بار اس لسٹ میں سر فہرست رہے ہیں۔ بل گیٹس کی دولت کا تخمینہ 75 ارب ڈالر لگایا گیا ہے، جو پچھلے سال 79.2 بلین ڈالر تھی۔امیزون کے بانی جیف بیزوس اور فیس بک کے بانی مارک زکر برگ پہلی مرتبہ دس امیر ترین افراد میں جگہ بنانے میں کامیاب ہوئے ہیں۔ وہ لسٹ میں بالترتیب پانچویں اور چھٹے نمبر پر موجود ہیں۔ عالمی کساد بازاری کی وجہ سے اس سال لسٹ میں بڑی تبدیلیاں رونما ہوئیں۔ سب سے زیادہ فائدہ فیس بک کے بانی مارک زکر برگ کے حصے میں آیا جن کی دولت میں 11.2 ارب ڈالر کا اضافہ ہوا۔ جبکہ کارلوس سلِم کی دولت میں بد ترین 27.1 ارب ڈالر کی کمی واقع ہوئی۔