اسلام آباد( نیوزڈیسک ) خوشحال خان خٹک پشتو زبان کے ایسے قد آور شاعر ہیں جنہوں نے قلم اور تلوار کے ذریعے امن کا پیغام دیا ، دو صدیاں گزر جانے کے باوجود یہ جنگجو شاعر آج بھی پشتونوں کے دلوں پر راج کر رہے ہیں۔ پختون قوم کی روایات ، اقدار اور پشتو شاعری کا جب بھی ذکر ہوتا ہے تو خوشحال خان خٹک کے بغیر یہ تذکرہ ادھورا ہی رہتا ہے۔ پشتو زبان کے یہ بے بدل شاعر ضلع نوشہرہ کے علاقے اکوڑہ خٹک میں 1613ئ میں پیدا ہوئے۔ بچپن ہی سے شعر کہنا شروع کیا۔ انگریز سامراج کے خلاف اپنے اشعار کے ذریعے آواز بلند کی اور پشتونوں کو ان کا عہد ماضی یاد دلایا۔ امن کے حوالے سے بھی لازوال اشعار کہے۔ شاعر مشرق علامہ اقبال بھی ان کے اشعار سے متاثر تھے اسی لئے انہوں نے خوشحال خان خٹک کو بابائے افغان کا لقب دیا۔ پشتو کے یہ عظیم شاعر نہ صرف ادیب اور حکیم تھے بلکہ وہ ایک بے مثل جنگجو بھی تھے جن کی تلوار کی کاٹ کا ہر جانب چرچا تھا۔ غیرت مند پختون کے طور پر انہوں نے آخری دم تک تلوار بلند کئے رکھی۔ خوشحال بابا نے اشعار تو کئی سو سال قبل کہے لیکن ان میں آج بھی اس خطے میں جاری دہشتگردی کے خاتمے کا حل موجود ہے۔ پشتو کے یہ عظیم شاعر 88 سال کی عمر میں خالق حقیقی سے جا ملے۔ اکوڑہ خٹک کے پہاڑی سلسلے کے دامن میں انہیں پیوند خاک کیاگیاجہاں ان کامقبرہ آج بھی موجود ہے۔