کراکس (نیوز ڈیسک) گزشتہ ماہ دنیا کے خطرناک ترین شہروں کی فہرست جاری کی گئی تو وینز ویلا کے دارالحکومت کراکس کا نام سرفہرست تھا۔ دہشت گردی اور جنگ سے تباہ حال شہروں کی بجائے کراکس کو دنیا کا خطرناک ترین شہر کیوں قرار دیا گیا اس کا اندازہ ان انکشافات سے کیا جاسکتا ہے جو اس شہر کے خونی منظرنامے سے پردہ اٹھاتے ہیں۔ اخبار ”ڈیلی سٹار“ نے آئرلینڈ سے تعلق رکھنے والے 53 سالہ شخص پال کینی کا ایک انٹرویو شائع کیا ہے جس میں کراکس کے خوفناک شب و روز کی تفصیلات بیان کی گئی ہیں۔ پال کینی کا کہنا ہے کہ اسے اکتوبر 2008ءمیں منشیات سمگلنگ کے جرم میں کراکس ائیرپورٹ پر گرفتار کیا گیا۔ گرفتاری کے بعد پال کینی کو لاس ٹیکوس جیل پہنچادیا گیا جہاں انہیں اپنی زندگی کے خوفناک ترین تجربات سے گزرنا پڑا۔ پال کینی نے بتایا کہ گرفتاری کے کچھ دیر بعد ہی ایک کسٹمز اہلکار نے ان کے ساتھ جنسی زیادتی کی، جس کے بعد انہیں جیل بھیج دیا گیا ۔
جیل پہنچتے ہی پہلا خوفناک واقعہ اس وقت پیش آیا جب ایک قیدی اپنی جیب میں موجود گرنیڈ پھٹنے سے ہلاک ہوگیا۔ وہ کہتے ہیں کہ جیل کے گارڈ آئے اور ہلاک ہوجانے والے شخص کے جسم کے ٹکڑوں کو یوں آرام سے اکٹھا کرکے لے گئے گویا یہ روز کا معمول ہو۔ پال کینی کا کہنا ہے کہ کچھ عرصہ بعد جیل میں ایک شخص کو محض اس وجہ سے گولیوں سے اڑادیا گیا کہ اس کے ساتھی قیدی اسے ناپسند کرتے تھے۔ اس شخص کو ہلاک کرنے کے بعد اس کا سر کاٹ کر علیحدہ کیا گیا اور اسے ہلاک کرنے والے قیدی سر کے ساتھ فٹبال کھیلتے رہے۔ پال کینی کا کہنا ہے کہ انہوں نے اپنی زندگی میں اس سے زیادہ دہشت ناک منظر کبھی نہیں دیکھا۔
اس شہر کی سڑکوں پر یہ حالات ہیں کہ کوئی بھی کسی بھی وقت گولی کا نشانہ بن سکتا ہے۔ ایک نوعمر لڑکے کو محض ایک تربوز کی خاطر ہلاک کردیا گیا۔ یہ لڑکا اپنے کندھے پر تربوز اٹھائے جارہا تھا کہ ایک غنڈے نے اس سے تربوز مانگا۔ لڑکے نے جب تربوز دینے سے انکار کیا تو غنڈے نے اس پر گولی چلادی، جو اس کے سر کو چیرتی ہوئی تربوز میں سے گزرتی ہوئی دوسری طرف نکل گئی۔ 2005ءمیں مس یونیورس منتخب ہونے والی مونیکا سپیئر بھی کراکس کی بے امنی کی نظر ہو گئیں۔ انہیں سربازار گولی مار کر ہلاک کردیا گیا، جبکہ ایک اور بیوٹی کوئن 22 سالہ جینسز کارمونا کو بھی گولی مار کر ہلاک کیا گیا۔ ماہر عمرانیات مارکس روبیو نے کراکس کے حالات پر تبصرہ کرتے ہوئے کہا کہ یہ شہر دنیا میں جہنم ہے۔ اس کے حالات اس قدر خوفناک ہوچکے ہیں کہ آپ اس سے برے حالات کا تصور نہیں کرسکتے، شاید یہ شہر زوال کی آخری حدوں کو چھو رہا ہے۔