تصویر میں نظر آنے والا گھر ایکڑ پر ٗ کنال پر‘ نہ ہی میلوں پر مشتمل ہے ہاں جی یہ گھر صرف10سے 12 فٹ ایریا پر بنایاگیا‘ یہ ا نوکھا کام ایک کینیڈین کمپنی نے کیا ہے۔ اس گھر کی بنیادیں زمین کے اندر نہیں بلکہ زمین کے اوپر موجود ہیں لہٰذا آپ اسے جہاں چاہیں گھر کے سامان کی طرح منتقل کر سکتے ہیں۔ اسے شروع میں “Kent Home”کا نام دیاگیا تھا مگر اب اسے NOMAD HOMES (خانہ بدوش گھر)کا نام دیاگیا ہے۔ دس فٹ رقبہ پر تعمیر گھر کے فرنیچر ز کے بارے میں جان کر آپ کی حیرانی مزید بڑھ جائے گی۔ اس جدید موبائل ہوم میں بیڈروم ٗ باتھ روم اورکچن کے ساتھ ساتھ لیونگ روم بھی موجود ہے۔

اس گھر کو بنانے کا مقصد بھی انتہائی دلچسپ ہے ۔ڈیزائنر آئین کینٹ کا کہنا ہے کہ ہم میں سے ہر ایک کی خواہش ہوتی ہے کہ وہ بڑے شہروں اور دارالحکومتوں میں رہے اور وہاں اس کا خود اپنا گھر ہو۔ اس خواہش کو پایہ تکمیل تک پہنچانے میں ہماری عمر گزر جاتی ہے مگر ہم اس گھر کا خواب اپنی آنکھوں میں لئے اس دنیا سے رخصت ہو جاتے ہیں۔ اب ایسا نہیں ہوگا آپ بڑے شہروں میں کام بھی کر سکیں گے اور وہاں اپنے گھر میں رہ بھی سکیں گے۔
آئین کینٹ کا کہنا ہے کہ انہیں اس گھر کو مکمل ڈیزائن کرنے میں 35 سال لگ گئے۔ اب اس گھر کو دیکھ کر بندہ حیران ہوئے بنا ء نہیں رہ سکتا کہ ایک شخص نے اپنی زندگی کے35 سال اس چھوٹے سے گھر کو ڈیزائن کرنے میں لگا دئیے۔ اس گھر کے اندر جھانکیں تو اس گھر میں مختصر ترین سی جگہ میں ضروریات زندگی کی تمام اشیاء کو اس ترتیب سے ڈیزائن کیاگیا ہے کہ دیکھنے والا داد دیئے بغیررہ ہی نہیں سکتا۔

اس گھر کی دیواریں بہت شاندار اور مضبوط ہیں‘ان دیواروں کو آگ کی حرار ت بھی نقصان نہیں پہنچا سکتی اور نہ ہی پانی ان دیواروں کی مضبوطی اور خوبصورتی پر اثر انداز ہو سکتا ہے۔ گھر میں داخل ہو کر سامنے لیونگ روم ہے ‘یہاں تین چار لوگ آسانی سے بیٹھ سکتے ہیںْ یہاں ہی ایک سائیڈ پر کچن جبکہ دوسری جانب باتھ روم ڈیزائن کیاگیا ہے۔ اس گھر میں بجلی کا انتظام سولر سسٹم کے ذریعے کیاگیا ہے ۔گھر کی چھت سولر پینل سے آراستہ ہے اور ان پلیٹس سے بنائی جانے والی بجلی اس ’’خانہ بدوش گھر‘‘ کی ضرورت سے کہیں زیادہ ہوتی ہے۔