اطلاعات کے مطابق روس میں ایک سستی ایئر لائن نے مسافروں کے جہاز پر چیونگ گم چبانے پر پابندی عائد کر دی ہے ۔ان کے مطابق اسے ہٹانے کے لیے رگڑنے سے جہاز کے اندرونی حصے کو نقصان پہنچتا ہے۔تاس نیوز ایجنسی کے مطابق پوبیدا نامی یہ سستی ایئر لائن روس میں 17 مختلف مقامات پر پروازوں کی سہولیات فراہم کر رہی ہے اور اس نئے قانون کا اثر اس پر سفر کرنے والے افراد پر ہو گا۔اس سے قبل ایئر لائن کے سی ای او آندرے کالمیکوف نے کہا تھا کہ مسافروں کی جانب سے جہاز میں چبا کر پھینکے گئے چیونگ گم کے ایک ٹکڑے کو ہٹانے پر 1700 ڈالر خرچ ہوتے ہیں۔پوبیدا ایئر لائن کی ترجمان یلینا سیلیوانوا کا کہنا ہے کہ ’ایئر لائن کو ہونے والے نقصان کی وجہ سے ہم نے جون کے وسط سے چیونگ گم پر پابندی عائد کر دی تھی۔‘
ٹوئٹر پر بعض افراد اس ’نو گم‘ قانون سے زیادہ متاثر نظر نہیں آتے ۔ایک شخص نے اپنی ٹویٹ میں لکھا ہے کہ ’اس پالیسی سے مجھے اپنے سکول کے دن یاد آگئے ہیں۔‘ ایک اور شخص کو اس بات پر حیرانی ہے کے یہ قانون نافذ کیسے کیا جائے گا۔ وہ لکھتے ہیں کہ ’مسافر، اپنا منہ کھولیں، دکھائیں آپ کی جیبوں میں کیا ہے۔‘آندرے کالمیکوو کا کہنا ہے کہ صرف چیونگ گم ہی نہیں ہے جس سے ایئر لائن کو نقصان پہنچ رہا ہے بلکہ مسافر جہازوں میں موجود کئی دوسرے ہزاروں ڈالر کی مالیت کے آلات کو بھی نقصان پہنچاتے ہیں۔ جن میں لائف جیکٹس اور تحفظ کے ہدایتی کارڈ شامل ہیں