ایران کے شہر شیراز میں نمک سے بنا ہوا ایک ہوٹل کھولا گیا ہے۔ اس کو سالٹ ریسٹورنٹ کہتے ہیں یہ مکمل طور پر نمک سے بنا ہوا ہے اس کی دیواریں، کاونٹرس‘ میزیں، کرسیاں نمک کی ہیں یہاں تک کہ سیڑھیوں پر بھی نمک کی پرت ہے۔ یہ ہوٹل ایران کے ایک مشہور تعمیراتی امتیاز ڈیزائننگ گروپ نے تیارکیاہے
اس ہوٹل میں مقامی طور پر دستیاب نمک کا استعمال کیاگیا ہے بعض مقامات پر پتھروں اور سمنٹ کا استعمال کیاگیا ہے۔ مقامی طور پر معدنی نمک کانوں سے نکلتا ہے اس ہوٹل کی تعمیر اس طرح کی گئی کہ نمک کو پیس کر اس میں گوند ملایاگیا اور اس خمیرسے دیواریں وغیرہ تعمیر کی گئیں (شیراز کی ایک جھیل سے نمک پیدا ہوتا ہے)
پہلے انجینئروں نے مقامی طور پر دستیاب نمک کے نمونوں میں گوند ملاکر دیکھا جو سب سے پائیدار تھا، تب اس نمک کو استعمال کیاگیا۔ یہ ہوٹل روایتی عمارتوں کی طرح نہیں بلکہ ایک قدرتی غارکی شکل میں بنایا گیا ہے ۔ بتایا جاتا ہے کہ نمک کے طبی فوائد بھی ہوتے ہیں۔ بالخصوص تنفس سے متعلق امراض اور زہریلے مادوں کے اثرات کو نمک زائل کرنے میں معاون ہے۔
یہ ہوٹل سیاحوں میں دو وجہ سے مقبول ہورہا ہے ایک تو اس کو قدرتی غار کی شکل دی گئی ہے دوسرے یونانی علاج میں نمک کے فوائد لوگوں کو یہاں کھینچ لاتے ہیں۔ لوگ یہاں نمک کے پانی سے غسل کرنے یا نمک کے پانی کی بھانپ لینے جیسی سہولتیں فراہم کرنے کا مطالبہ کررہے ہیں۔
