اخبار ڈیلی میل کا کہنا تھا کہ طب کی تاریخ میں خود بخود انسانی جسم میں آگ لگنے کے واقعات انوکھے ضرور ہیں ، لیکن ایسے واقعات پہلے بھی ہوچکے ہیں۔ اخبار کی رپورٹ میں بتایا گیا ہے کہ معمر اور شراب نوش افراد کے ساتھ ایسے 200 واقعات ماضی میں بھی پیش آچکے ہیں۔ لیکن سائنسدان اور محقق اس ضمن میں کوئی حتمی رائے قائم کرنے سے گریزاں ہیں۔ چنائے کہ ایک پولیس افسر کا نام ظاہر نہ کرنے کی شرط پر کہنا تھا کہ 2013ء میں بھی جب اس خاتون کا پہلا بچہ پراسرار آگ لگنے سے زخمی ہواتھاتواس علاقے کے معززین نے بچے کی والدہ راجیش وری دیوی اور اس کے شوہر کو علاقے سے یہ کہہ کر نکال دیا تھا کہ وہ بچے پر تشدد یا جادو کرتے ہیں۔
اب یہ جوڑا دوسرے علاقے میں رہائش پذیر ہے۔ پولیس کے اعلیٰ حکام نے بھی چھ دن کے اس بچے کے والدین سے گھنٹوں تفتیش کی ، جس کے دوران بچے کی والدہ راجیش وری دیوی نے بتایا کہ ان کاپہلابچہ بھی اسی طرح کی پراسرارآتشزدگی سے جل کر زخمی ہوگیا تھا۔ لیکن وہ آج تک نہیں جان سکی کہ اس کے جسم میں خود بخود آگ کیسے لگی۔ اس بچے کے جلنے کے دو سال بعد پیدا ہونے والے دوسرے بچے کے جسم میں بھی آگ لگ گئی۔ آگ کی تپش اور تکلیف سے بچہ رونے لگا۔ راجیش وری دیوی کے بقول وہ اس منظر کو دیکھ کر حیران رہ گئی اور اس نے فوری طور پر بچے کے پیروں میں لگنے والی آگ کو موٹے کپڑے کی مدد سے بجھایا اور اس کو لے کر فوراً اسپتال کے ایمرجنسی وارڈ میں پہنچی ، جہاں ڈاکٹروں نے اس کا ابتدائی طبی معائنہ کر کے بتایا کہ یہ شیر خوار بچہ پیروں میں آگ لگنے کی وجہ سے 5 فیصد تک جھلس گیا ہے۔
تاہم بچے کی والدہ راجیش وری دیوی کی جانب سے اس آگ کو پراسرار قرار دینے کے بیان کے بعد پولیس حکام نے تفتیش شروع کر دی ہے ، اور ماہرین اطفال کی ٹیم کے ساتھ مشاورت کے بعد اس بچے کو اسپیشل وارڈ میں منتقل کر دیا گیا ، جہاں ایک محافظ کی نگرانی میں بچے کو رکھا گیا ہے ، تاکہ اس بات کی جانچ کی جاسکے کہ آیا بچے کے جسم میں خود بخود آگ لگی تھی ، یاکسی نے آگ لگا ئی تھی۔