اعداد و شمار کے مطابق 1860ء کی دہائی میں ہندوستان کے مسلمانوں کی شرح خواندگی 85 فیصد تھی کیونکہ بچوں کو بچپن ہی سے مساجد میں بھجوا دیا جاتا تھا جہاں انہیں قرآن و حدیث کے علاوہ گلستان و بوستان‘ سعدی‘ فلسفہ‘ ادب‘ فارسی زبان پڑھانے کے ساتھ ساتھ لکھنا سکھایا جاتا تھا۔ ماڈرن سائنسی تعلیم کے لئے الگ اسکول اور یونیورسٹیاں بنانا پڑیں۔ غریب بچے اس کا خرچ افورڈ نہیں کرسکتے تھے وہ پیچھے رہ گئے۔ دوسری طرف مسجد کا ایک اہم رول ذہنی تشکیل اور کردار سازی تھا وہ وقت کی دھول میں گم ہوگیا۔ پاکستان بنا تو ہماری شرح خواندگی تیرہ فیصد تھی۔ صدیوں تک مساجد کم وسیلہ حضرات اور مسافرین کے لئے جائے پناہ تھیں جہاں محلے کے لوگ ان کے کھانے کا اہتمام کرتے تھے۔ اب بے وسیلہ مسافر فٹ پاتھوں پر سوتے اور پارکوں میں بھوکے راتیں گزارتے ہیں۔ مساجد مسلمانوں میں اتحاد و یگانگت کا ذریعہ تھیں اب مذہبی منافرت اور فرقہ بندی پھیلانے کا ذریعہ بن چکی ہیں۔ بلاشبہ ماڈرن تعلیم‘سائنس اور ٹیکنیکل ایجوکیشن قومی ترقی کے لیے ناگزیر ہے لیکن ماڈرن نظام تعلیم کو اپنی اخلاقی اور دینی قدروں سے محروم کرنا ایک سنگین غفلت تھی جس نے قوم کی کردار سازی میں شگاف ڈال دیئے۔۔۔