وہ خصوصاً شعبہ ویکسین میں انقلابی اور جدید تبدیلیاں لے آئے۔ 1999ء میں بل نے 21 ارب ڈالر زبل اینڈ میلنڈا گیٹس فاؤنڈیشن کے حوالے کئے۔ اس سرمائے سے نئی ویکسین ایجاد کروائی گئیں پھر ادویہ ساز کمپنیوں سے انھیں بنوا اور خرید کر غریب ممالک میں تقسیم کیا گیا۔ یوں بین الاقوامی سطح پربذریعہ ویکسین بچوں کی جانیں بچانے والا انتہائی مؤثر نظام سامنے آگیا۔ آج بل گیٹس کا وضع کردہ ویکسین پروگرام دنیا بھر میں سالانہ’ ’25کروڑ‘‘ بچوں کو مختلف ویکسین مہیا کرتا ہے۔ اس پروگرام میں ترقی یافتہ ممالک بھی شامل ہو چکے ہیں وہ بھی فاؤنڈیشن کو کروڑوں ڈالر ز امداد دیتے ہیں۔ یہ پروگرام اب گیوی الائنس (Global Alliance for Vaccines and Immunisation)کے نام سے مشہور ہے۔2001 سے اب تک گیوی الائنس پاکستان کے ویکسین پروگرام کو 30 کروڑ ڈالرزکی امداد دے چکا ہے یوں ممکن ہوا کہ لاکھوں پاکستانی بچوں کو بیماریوں مثلاً خسرہ‘ کالی کھانسی‘ زرد بخار‘پولیو‘ نمونیا‘ دست‘ ملیریا وغیرہ سے محفوظ رکھا جا سکے۔ اس کامیابی میں اہم ترین کردار بل گیٹس ہی کا ہے۔اس دوران گیوی الائنس نے بھارت کو صرف ساڑھے چار کروڑ ڈالر زامداد دی۔ گیٹس فاؤنڈیشن کے انقلابی اقدامات کا ایک نتیجہ یہ نکلا کہ گزشتہ دس برس میں ویکسین کی قیمت بہت کم ہوگئی یوں ممکن ہوگیا کہ زیادہ سے زیادہ غریب بچوں کو فائدہ پہنچے۔ بل کاکہنا ہے’’اب میری سب سے بڑی خواہش یہی ہے کہ دنیا بھر میں شرح اموات 80 فیصد تک کم کردوں‘ اگر میں اور میری ٹیم یہ منزل نہ پا سکے تو ہمیں صدمہ ہوگا کیونکہ اس کا مطلب یہی ہوگا کہ ہم نے اپنا کام صحیح طرح انجام نہیں دیا‘‘۔
بل گیٹس ہارورڈ یونیورسٹی امریکہ میں طلبہ و طالبات سے خطاب کرنے گئے‘محفل میں ایک طالب علم نے ان سے سوال کیا ’’آپ اپنی کس اختراع کو اوّلیت دیتے ہیں‘مائیکروسافٹ ونڈوز کو یا ویکسین منصوبے کو؟‘‘ بل نے جواب دیا ’’کمپیوٹر سافٹ ویئر پروگراموں کی اہمیت اپنی جگہ لیکن جہاں تک انسانی جانیں بچانے کا سوال ہے‘ اس اعتبار سے یقیناًویکسین ہی کو برتری حاصل ہے۔‘‘
مزید پڑھیے:ایک پرُکشش خاتون ڈکیت کا عروج و زوال
پاکستان میں بھی کئی صاحب ثروت افراد موجود ہیں‘ ضرورت اس امر کی ہے کہ وہ بھی بل گیٹس کی تقلید کرتے ہوئے دنیا بھر میں نہ سہی اپنے گھر کی حالت سنوارنے پر ہی کچھ نہ کچھ خرچ کر دیں۔