اسلام آباد (این این آئی)وفاقی وزیر خزانہ سینیٹر اسحاق ڈار نے کہا ہے کہ آئندہ 3 برس تک کسی نوجوان یا نوجوانوں پر مشتمل ایسوسی ایشن آف پرسن (اے او پی)کے شروع کردہ کاروبار پر ٹیکس میں 50 فیصد کمی کی تجویز ہے۔ جمعہ کو بجٹ تقریر میں وزیر خزانہ نے کہا کہ یہ رعایت فرد کی صورت میں 20 لاکھ اور کمپنی کی صورت میں 50 لاکھ روپے تک ہوگی۔

انہوں نے کہاکہ اس سہولت سے فائدہ اٹھانے کے لییضروری ہے کہ کاروبار کے مالک کی عمر 30 سال سے کم ہو اور کاروبار یکم جولائی 2023 کے بعد شروع کیا جائے۔اسحاق ڈار نے کہا کہ پرائم منسٹر یوتھ پروگرام فار اسمال لونز کے لیے 10 ارب روپے مختص کیے ہیں۔انہوں نے کہا کہ پرائم منسٹر یوتھ اسکل پروگرام کے تحت نوجوانوں کی اسپیشلائزڈ ٹریننگ کیلیے 5 ارب روپے مختص کیے گئے ہیں۔وزیر خزانہ نے کہاکہ نوجوان حکومت کی خاص توجہ کے متقاضی ہیں، یہی ملک کے روشن مستقل کے ضامن ہیں۔