لاہور( این این آئی)لاہور کی انسداد دہشتگردی عدالت نے پاکستان تحریک انصاف کے رہنما محمود الرشید اور 13خواتین کو جوڈیشل ریمانڈ پر جیل بھجوا دیا جبکہ یاسمین راشد کی جناح ہائوس جلائو گھیرائو کے مقدمے میں بریت کے خلاف اپیل کی سماعت نہ ہوسکی۔

انسداد دہشت گردی عدالت کی جج عبہر گل خان نے کلمہ چوک پر کنٹینر جلانے اور جلائو گھیرائو کے خلاف کیس کی سماعت کی۔ جس کے بعد عدالت نے محمود الرشید کو جوڈیشل ریمانڈ پرجیل بھجوا دیا۔جبکہ جناح ہائوس حملے میں ملوث 13 خواتین کو جسمانی ریمانڈ مکمل ہونے پر انسداد دہشت گردی عدالت میں پیش کیا گیا۔تفتیشی افسر نے بتایا کہ تمام 13 خواتین کی شناخت پریڈ شناخت ہو چکی ہے، مال مسروقہ، پیٹرول بم اور دیگر سامان برآمد کرانا ہے، عدالت ملزمان کا مزید جسمانی ریمانڈ منظور کرے۔

انسداد دہشت گردی عدالت لاہور نے پولیس کی استدعا مسترد کرتے ہوئے 13 خواتین ملزمان کو 14 روز کے لیے جوڈیشل ریمانڈ پر جیل بھیج دیا۔دوسری طرف لاہور ہائیکورٹ میں یاسمین راشد کی جناح ہائوس جلاو گھیرا کے مقدمے میں بریت کے خلاف اپیل کی سماعت مقدمہ ڈی لسٹ ہونے کی وجہ سے نہ ہوسکی۔ پولیس نے رہنما پی ٹی آئی یاسمین راشد کو عدالت پہنچایا تھا، عدالت نے تفتیشی افسر سے مقدمے کا ریکارڈ طلب کر رکھا تھا۔یاد رہے کہ حکومت پنجاب نے ڈاکٹر یاسمین راشد کو جناح ہائوس جلائو گھیرا ئو کے مقدمے سے ڈسچارج کرنے کیخلاف اپیل دائر کر رکھی ہے۔

موضوعات:محمود الرشید