اسلام آباد (این این آئی)وزیر اعظم محمد شہباز شریف نے کہا ہے کہ میری تمنا ہے کہ پاکستان کڈنی اینڈ لیور انسٹیٹیوٹ (پی کے ایل آئی)گردہ، جگر کی بیماریوں کے علاج معالجہ کیلئے پاکستان کی پہچان بنے،یہ ہمیشہ میرے دل کے قریب رہا ہے، یہ ایک مثال ہے، ہم اس مثال کو بے مثال بنائیں گے، انشااللہ!۔
وزیر اعظم نے اتوار کو اپنے ایک ٹوئٹ میں کہا کہ پاکستان کڈنی اینڈ لیور انسٹیٹیوٹ ہمیشہ سے میرے دل کے قریب رہا ہے، میری تمنا تھی اور ہے کہ یہ شاندار ہسپتال پاکستان کا جان ہاپکنز بنے اور گردے، جگر کی بیماریوں کے علاج معالجہ کے لیے (پی کے ایل آئی)پاکستان کی پہچان بن جائے۔ وزیر اعظم نے کہا کہ صد افسوس کہ عمران نیازی اور ایک سابق چیف جسٹس نے اس مشن کو اپنی سیاست اور ذاتی مفادات کا نشانہ بنایا اور اس ہسپتال کو بے پناہ نقصان پہنچایا، مگر ہمارے قدم رکنے والے نہیں ہیں۔
انہوں نے اس یقین کا بھی اظہار کیا کہ اللہ تعالی یقینا ان لوگوں کی مدد کرتا ہے جو جذب خدمت سے سرشار ہوں۔(پی کے ایل آئی)کو ورلڈ کلاس بنانے اور اس کی بحالی کے لیے ہم تمام کوششیں اور توانائیاں صرف کر رہے ہیں۔ وزیر اعظم محمد شہباز شریف نے کہا کہ گزشتہ روز میرے (پی کے ایل آئی)کے دورے کا مقصد وہاں بحالی کے لیے کیے جانے والے اقدامات کا ہی جائزہ لینا تھا۔ انہوںنے کہاکہ مجھے یہ جان کر خوشی ہوئی کہ ڈاکٹر سعید اختر کی قیادت میں ایک مخلص ٹیم وہاں ہمہ تن مصروف اور مقصد میں مگن ہے جس میں ہم ان کے ساتھ ہیں۔ پی کے ایل آئی یایک مثال ہے، ہم اس مثال کو بے مثال بنائیں گے، انشااللہ!۔
