لاہور( این این آئی)مرکزی صدر تحریک انصاف چودھری پرویزالٰہی سے سابق صوبائی وزراء میاں محمود الرشید، چودھری محمد اکرم، عامر سلطان چیمہ، چودھری گلزار محمد، چودھری مقصود سلہریا، لیاقت بھدر، منظور وڑائچ ایڈووکیٹ اور دیگر رہنمائوں نے ملاقات کی۔ چودھری پرویزالٰہی نے کہا کہ مذاکرات کی کہانی ختم ہو چکی ہے اب سپریم کورٹ کے فیصلے پر عملدرآمد ہو گا،

کوئی چیف جسٹس کو گھر بھیجنے کی جرات نہیں کر سکتا، چیف جسٹس کو گھر بھیجنے کی دھمکیاں دینے والے اس بار خود گھر جائیں گے، پوری قوم چیف جسٹس عمر عطا بندیال کے ساتھ کھڑی ہے وہ قوم کے ہیرو بن چکے ہیں، چیف جسٹس نے آئین پاکستان اور اپنے حلف کی پاسداری کا حق ادا کر دیا ہے۔ چودھری پرویزالٰہی نے کہا کہ پہلی مرتبہ پوری دنیا میں پاکستانی عدلیہ کو خراج تحسین پیش کیا جا رہا ہے،

چیف جسٹس کے آئین کی بالادستی پر مبنی فیصلے کی گونج امریکی کانگریس میں بھی سنائی دے رہی ہے، امریکہ کی حکمران پارٹی کے رکن بریڈ شرمین سپریم کورٹ کے فیصلہ پر عملدرآمد نہ ہونے پر حیرت اور تشویش کا اظہار کر چکے ہیں۔ چودھری پرویزالٰہی نے کہا کہ سپریم کورٹ نے پی ڈی ایم حکومت کو مذاکرات کا محفوظ راستہ دیا تھا لیکن نوازشریف کا مسئلہ یہ ہے کہ الیکشن میں ان کو ن لیگ کی سیاسی موت نظر آتی ہے اسی لیے وہ مذاکرات کو کامیاب ہوتے دیکھنا ہی نہیں چاہتے،

نوازشریف نے پی ڈی ایم میں اپنی ویٹو پاور سے مذاکرات کو کامیاب نہیں ہونے دیا، نوازشریف پاکستان میں الیکشن نہیں بلکہ انارکی چاہتے ہیں، خواجہ آصف اور رانا ثناء اللہ نوازشریف اور شہبازشریف کے اشارے پر ہی سپریم کورٹ کے خلاف زہر اگلتے ہیں۔ چودھری پرویزالٰہی نے کہا کہ میں نے پہلے ہی کہہ دیا تھا کہ شہبازشریف اور محسن نقوی کی مفت آٹا سکیم لوٹ مار کا منصوبہ ہے، اب تو سینئر ن لیگی رہنما شاہد خاقان عباسی بھی اس کی تصدیق کر چکے ہیں،

مفت آٹا سکیم میں 20 ارب سے کہیں زیادہ کی کرپشن ہوئی ہے، شہبازشریف اور محسن نقوی مفت آٹا سکیم میں کرپشن کی انکوائری کبھی نہیں کروائیں گے لیکن انشاء اللہ مفت آٹا سکیم میں کرپشن کی انکوائری ہم کرائیں گے اور شہبازشریف اور محسن نقوی سے قوم کی پائی پائی وصول کر کے قومی خزانے میں جمع کروائیں گے۔ چودھری پرویزالٰہی نے مزید کہا کہ عمران خان اور میرے گھر پر حملے کرانے والوں کو پنجاب کے عوام الیکشن میں اس کا جواب دیں گے، کٹھ پتلی محسن نقوی کے ساتھ الیکشن کے بعد عوام جو کرے گی یہ تماشا پوری دنیا دیکھے گی۔