لاہور(این این آئی)سابق وزیراعلیٰ پنجاب و مرکزی صدر تحریک انصاف چودھری پرویزالٰہی اینٹی کرپشن گجرات کے جج رانا محمد سلیم کی عدالت میں پیش ہوئے۔ عدالت نے گوجرانوالہ اور گجرات کے دونوں مقدمات میں ان کی 23 مئی تک عبوری ضمانت منظور کر لی اور گرفتاری سے روک دیا ہے۔
بعد ازاں چودھری پرویزالٰہی نے میڈیا سے گفتگو کرتے ہوئے کہا کہ ہم عدالتوں کا دل سے احترام کرتے ہیں، حکومتی ایوانوں میں سمجھا جاتا ہے کہ ان کو ورغلا کر مذاکرات کرو اور نتقام کا نشانہ بھی بناؤ، نواز شریف اور شہباز شریف کے سابق کردار کو دیکھتے ہوئے کہہ سکتے ہیں کہ یہ منافقو ں کا ٹولہ ہے۔ انہوں نے کہا کہ محسن نقوی سراسر جھوٹ کی بنیادوں والا وزیراعلیٰ ہے، انشاء اللہ سپریم کورٹ کا فیصلہ آ رہا ہے پھر سب ٹھیک ہو جائے گا۔
چودھری پرویزالٰہی نے کہا ہماری قیادت کو سب پتہ ہیکہ یہ حکمران ایک طرف مذاکرات اور دوسری طرف چھاپے مارتے ہیں لیکن اب ایسے نہیں چلے گا۔ چودھری پرویزالٰہی نے کہا کہ خواجہ آصف نے نواز شریف اور شہباز شریف کا اصل چہرہ قوم کی سامنے پیش کر دیا ہے، یہ حکومت بھی کر رہے ہیں اور اپوزیشن بھی، معزز ججوں کے حوالے سے اور خاص کر موجودہ ججوں کے حوالے سے یہ کیا سمجھتے ہیں اب قوم نے جان لیا ہے۔ انہوں نے مزید کہا کہ اللہ کی لاٹھی بے آواز ہوتی ہے، اللہ تعالیٰ نے ہی ان کے اصل چہرے قوم کے سامنے بے نقاب کئے ہیں، یہ ہر معاملے میں جھوٹ بولتے ہیں۔
