راولپنڈی(این این آئی)جنوبی وزیرستان میں امن دشمنوں کیخلاف کارروائی کے دوران 8دہشتگردوں کو جہنم واصل کر دیا گیا اور دو جوان فرض پر قربان ہو گئے۔آئی ایس پی آرکی طرف سے جاری کردہ بیان کے مطابق سکیورٹی فورسز نے خیبرپختونخوا کے ضلع جنوبی وزیرستان کے علاقے زرملان میں انٹیلی جنس بنیاد پر آپریشن کیا۔

بیان کے مطابق سکیورٹی فورسز نے موثر طریقے سے دہشتگردوں کے مقام کا پتہ لگایا،اسی دوران سکیورٹی فورسز اور دہشت گردوں کے درمیان شدید فائرنگ کا تبادلہ ہوا،اس دوران 8دہشتگردوں کو جہنم واصل کر دیا گیا۔ ہلاک دہشت گردوں سے اسلحہ اور گولہ بارود بھی برآمد ہوا ہے۔آئی ایس پی آر کے مطابق مارے گئے دہشت گرد سکیورٹی فورسز کے خلاف دہشت گردی کی کارروائیوں اور معصوم شہریوں کے قتل میں سرگرم رہے۔بیان کے مطابق فائرنگ کے تبادلے کے دوران دو جوان فرض پر قربان ہو گئے، شہید ہونے والوں میں لانس نائیک شعیب علی اور سپاہی رفیع اللہ شامل ہیں۔آئی ایس پی آر کے مطابق شہید ہونے والے 25سالہ لانس نائیک شعیب علی کا تعلق ضلع کرم کے علاقے پارا چنارا سے تھا جبکہ 22سالہ سپاہی رفیع اللہ کا تعلق ضلع لکی مروت سے ہے۔بیان کے مطابق علاقے میں کلیئرنس آپریشن جاری ہے تاکہ علاقے میں پائے جانے والے دہشتگردوں کا خاتمہ کیا جا سکے۔ سیکیورٹی فورسز دہشت گردی کی لعنت کو ختم کرنے کے لیے پرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔