لاہور(مانیٹرنگ ڈیسک/ این این آئی) ’یہ تمہاری بیٹی نہیں‘‘ سابق بیوی کے طعنے پر باپ نے کمسن بچی کو گلا دبا کر مار ڈالا ۔ تفصیلات کے مطابق ہنجروال کے علاقہ میں سنگدل باپ نے اپنی تین سالہ بیٹی کو گلا دبا کر قتل کر دیا ۔ بتایا گیا ہے کہ ہنجروال پولیس کو

جناح ہسپتال میں 3سالہ بچی کی موت کی اطلاع موصول ہوئی ۔پولیس نے حالات مشکوک ہونے پر بچی کا پوسٹمارٹم کروانے کا کہا تو بچی کے والد نے پوسٹمارٹم کروانے سے انکار کیا اور موت کو طبعی رنگ دینے کی کوشش کی ۔پولیس کے پوسٹ مارٹم کروانے پر ڈاکٹرز نے بچی کی گلہ دبانے سے موت ہونے کی تصدیق کردی ۔پوسٹ مارٹم کے دوران ہی بچی کا والد خرم شہزاد موقع سے فرار ہو گیا۔ایس پی صدر وقار کھرل نے ملزم کی گرفتاری کے احکامات جاری کئے اور پولیس کی ٹیم نے فوری کارروائی کرتے ہوئے ملزم کو چند گھنٹوں کے اندر گرفتار کر لیا۔ملزم نے بچی کو گلہ دبا کر قتل کرنے کا اعتراف کر لیا۔ ملزم نے بتایا کہ اس کی بیوی طلاق لے کر جا چکی ہے اور 3سالہ معصوم زہرہ فاطمہ اپنے دیگر بہن بھائیوں کے ساتھ والد کے پاس رہتی تھی ۔ملزم کے مطابق اس کی سابقہ بیوی نے اسے طعنہ دیا تھا کہ زہرہ فاطمہ تمہاری بیٹی نہیں ہے ۔ہنجروال پولیس نے ملزم کے خلاف مقدمہ درج کر کے مزید تحقیقات کا آغاز کر دیا۔