اسلام آباد(پی پی آ ئی) وزیر اعظم شہباز شریف نے صدر مملکت ڈاکٹر عارف علوی کے خط کو یکطرفہ اور حکومت مخالف قرار دے دیا۔

شہبازشریف نے صدرعارف علوی کو 5 صفحات اور 7 نکات پر مشتمل جوابی خط لکھ دیا۔وزیرِاعظم شہباز شریف نے خط میں لکھا ہے کہ کہنے پرمجبورہوں کہ آپ کا خط تحریک انصاف کا پریس ریلیزدکھائی دیتا ہے،خط یکطرفہ اورحکومت مخالف خیالات کا حامل ہے۔انہوں نے کہا کہ حکومت مخالف خیالات کا آپ کھلم کھلا اظہارکرتے ہیں،آپ کا خط صدرکے آئینی منصب کا آئینہ دارنہیں،آپ مسلسل یہی کررہے ہیں، آپ نے قومی اسمبلی کی تحلیل کرکے سابق وزیرِ اعظم کی غیرآئینی ہدایت پرعمل کیا۔وزیرِ اعظم کاکہنا ہے کہ قومی اسمبلی کو تحلیل کےاآپ کے حکم کوسپریم کورٹ نے 7 اپریل کوغیرآئینی قرار دیا،آرٹیکل 91 کلاز 5 کے تحت میرے حلف پربھی آپ آئینی فرض نبھانےمیں ناکام ہوئے،کئی مواقع پرآپ منتخب آئینی حکومت کے خلاف فعال انداز میں کام کرتے آرہے ہیں۔شہبازشریف کا خط میں یہ بھی کہنا ہے کہ میں نے آپ کے ساتھ اچھی ورکنگ ریلیشن شپ کی پوری کوشش کی۔واضح رہے کہ صدرعارف علوی نے وزیراعظم شہبازشریف کو24 مارچ کوخط لکھا تھا۔