راولپنڈی (این این آئی)چیف آف آرمی سٹاف جنرل عاصم منیر نے کہا ہے کہ مختلف ریاستی اداروں کے درمیان ہم آہنگی وقت کی اہم ضرورت ہے،دہشت گردی کے خاتمہ تک اس کیخلاف لڑائی جاری رکھیں گے،شہداء کی قربانیاں رائیگاں نہیں جائیں گی،پاکستان میں مکمل امن انشاء اللہ بحال ہوگا۔
آئی ایس پی آر کے مطابق آرمی چیف نے منگل کو فارمیشن ہیڈکوارٹرز کا دورہ کیا جہاں انہیں آپریشنل تیاریوں، فارمیشن کی ٹریننگ اور سیکیورٹی امور پر بریفنگ دی گئی۔ آرمی چیف کو ضم شدہ اضلاع میں ترقیاتی کاموں پر بھی بریفنگ دی گئی۔آرمی چیف نے فارمیشن کی انسداد دہشت گردی کی کوششوں کو سراہا جبکہ سماجی و اقتصادی ترقی کے منصوبوں کیلئے موزوں ماحول کی بھی تعریف کی۔ اس موقع پر آرمی چیف جنرل عاصم منیر نے کہا کہ منصوبے ضم شدہ اضلاع کی دیرپا ترقی اور استحکام کیلئے بہت اہم ہیں۔انہوں نے عزم کا اظہار کیا کہ دہشت گردی کے خاتمہ تک اس کے خلاف لڑائی جاری رکھیں گے۔ انہوں نے کہا کہ پاکستان کے شہداء کی قربانیاں رائیگاں نہیں جائیں گی۔جنرل عاصم منیر نے کہا کہ پاکستان میں مکمل امن انشاء اللہ بحال ہوگا۔ انہوں نے کہا کہ مختلف ریاستی اداروں کے درمیان ہم آہنگی وقت کی اہم ضرورت ہے۔انہوں نے کہا کہ دہشت گردی کے خلاف جنگ میں پاکستانی عوام کی خصوصی اہمیت ہے۔
