انقرہ(این این آئی)ترکیہ میں ناقص تعمیرات کی وجہ سے زلزلے سے عمارتوں کی تباہی کے بعد ناقص تعمیرات میں ملوث افراد کیخلاف کارروائی کا آغازکردیا گیا۔ترک میڈیا کے مطابق ترک وزارت انصاف نے زلزلہ متاثرہ 10صوبوں میں تحقیقات کے دفاتربنانے کا حکم دے دیا۔عمارتوں کی ناقص تعمیرات میں ملوث
29 افراد کے وارنٹ جاری کردئیے گئے ہیں اور پولیس نے ناقص تعمیرات میں ملوث 12افراد کو حراست میں لے لیا۔ترک میڈیا کے مطابق گرفتار افراد کو ترک صوبے غازی انتیپ اور شانلیعرفا سے حراست میں لیا گیا۔رپورٹس میں کہا گیا کہ ترکیہ میں زلزلے سے 6ہزار سے زائد عمارتیں تباہ ہوئیں اور زیادہ تر عمارتیں ناقص تعمیرات کی وجہ سے تباہ ہوئیں۔دوسری جانب ماہرین نے زلزلے سے تباہی کی بڑی وجہ عمارتوں کی ناقص تعمیر اوربلڈنگ کوڈ پر عمل نہ کرنے کو قراردیا۔ترکیہ کے سیسمک بلڈنگ کوڈز کے مطابق عمارتیں طاقتور زلزلوں کو برداشت کرنے کے قابل ہونی چاہئیں، زمین کی سطح پر کم ازکم 30سے40فیصد ارتعاش یا ہلچل کو برداشت کرنا چاہیے لیکن ترکیہ میں موجودہ عمارتیں ڈیزائن کوڈ کی ضرورت سے بھی کم زلزلیکی شدت برداشت کرنے میں ناکام نظر آئیں ۔خیال رہے کہ ترکیہ اور شام میں زلزلے سے ہلاکتوں کی تعداد 23ہزار سے تجاوز کرچکی ہے۔ ترکیہ میں 20ہزار 2013اور شام میں 3553افراد ہلاک ہوچکے ہیں جبکہ ہزاروں افراد زخمی اور بے گھر ہوئے ہیں۔
