لاہور(مانیٹرنگ ڈیسک، آن لائن)پی ٹی آئی رہنما عامر ڈوگر نے نجی ٹی وی پروگرام میں گفتگو کرتے ہوئے کہا ہے کہ چیئرمین پی ٹی آئی عمران خان اگرڈس کوالیفائی ہوئے تو ملک ٹوٹے گا، ملک میں انتشار پھیلے گا،سیاسی عدم استحکام بڑھے گا۔عمران خان اس وقت ملک کا
سب سے پاپولر لیڈر ہے ۔دوسری جانب لاہور ہائی کورٹ نے پاکستان تحریک انصاف 43 ایم این ایز کے استعفے منظور کرنے کا حکم معطل کر دیا ہے۔بدھ کے روز لاہور ہائی کورٹ کے جسٹس شاہد کریم نے تحریک انصاف کے 43 مستعفیٰ اراکین قومی اسمبلی کی درخواست پر سماعت کی۔ درخواست میں مؤقف اختیار کیا گیا تھا کہ ممبران اسمبلی نے استعفیٰ منظور ہونے سے قبل ہی واپس لے لیے تھے۔دوران سماعت پی ٹی آئی اراکین کے وکیل بیرسٹر علی ظفر نے کہا کہ استعفے منظور کرنے سے قبل قانونی تقاضے پورے نہیں کیے گئے۔ جسٹس شاہد کریم نے بیرسٹر علی ظفر سے استفسار کیا کہ بتائیں کس قانون کو فالو نہیں کیا گیا؟۔ بیرسٹر علی ظفر نے استعفے منظور کرنے کے طریقہ کار کے بارے میں عدالت کو آگاہ کیا۔بعد ازاں عدالت نے پی ٹی آئی کے 43 اراکین قومی اسمبلی کو ڈی نوٹیفائی کرنے کا الیکشن کمیشن کا حکم معطل کرتے ہوئے 43 حلقوں میں ضمنی الیکشن تاحکم ثانی روک دیا۔ لاہور ہائی کورٹ نے اس حوالے سے جواب طلب کرنے کے لیے الیکشن کمیشن سمیت دیگر فریقین کو نوٹسز بھی جاری کردیئے۔
عمران خان ڈس کوالیفائی ہوا تو ملک ٹوٹے گا ۔۔ عامر ڈوگر ۔ pic.twitter.com/SASr0KqpCp
— Raza Ahmad Rumi (@Razarumi) February 7, 2023
