کراچی(این این آئی)لانڈھی میں ننھے سعد کے قاتل حسن اور سہیل نے بچے کے اغوا سے لیکر قتل تک کی تفصیلات بتادیں۔تفصیلات کے مطابق کراچی کے علاقے لانڈھی کے علاقے میں 6 سالہ بچے کے اغوا، زیادتی اور قتل کے کیس کی سماعت ہوئی، جوڈیشل مجسٹریٹ شرقی کی عدالت نے دونوں ملزمان کا اعترافی بیان ریکارڈ کرلیا۔ننھے سعد کے قاتل گرفتار ملزمان سہیل اور حسن نے بچے کے اغوا سے لیکر قتل تک کی تفصیلات بتادیں، ملزم حسن نے بیان دیا کہ میں گوشت کا کام کرتا ہوں اور 18 ستمبر کو باڑے کے پاس موجود تھا، میرے ساتھ ملزم سہیل بھی موجود تھا، بچہ خالہ کے گھر سے باہر آیا تو سہیل نے اسے چیز دلوائی اور باڑے لے آیا۔
ملزم حسن نے پولیس کو بیان دیا کہ باڑے میں تھوڑی دیر بچے کو جانور دکھائے اور پھر کمرے میں لے گئے، پہلے سہیل نے بچے سے زیادتی کی اس کے بعد میں نے زیادتی کی، بچے کے ہاتھ پائوں باندھ کر اوپر کپڑا ڈال دیا تاکہ اس کی آواز نہ نکلے، اس کے بعد سہیل نے بچے کو کمرے سے باہر نکالا اور گلا دبایا۔ملزم حسن نے کہا کہ سہیل نے بچے کے سر پر بلاک مارا جس سے وہ مرگیا جس کے بعد ہم نے بھوسے کے کٹے میں لاش ڈال کر اسے گندی گلی میں پھینک دیا، سہیل گھر سے قالین لیکر آیا اوپر رکھا اور پھر بلاک رکھ دیا، ہمیں لاش کا معلوم تھا اس لئے ورثا کو خود لیکر وہاں گئے۔ننھے سعد کے دوسرے قاتل ملزم سہیل نے بیان دیا کہ ملزم حسن کے کہنے پر بچے کو باڑے میں لیکر گیا تھا، پہلے میں نے پھر حسن نے بچے سے زیادتی کی، حسن نے بچے کو مارا جس کے بعد گندے نالے میں پھینک دیا، عدالت نے دونوں ملزمان کا اعترافی بیان ریکارڈ کرکے ریکارڈ پر رکھ لیاہے۔
