لاہور(مانیٹرنگ، این این آئی)پی ٹی آئی نے پرویز الٰہی پر اعتماد کے ووٹ پر رائے شماری کیلئے راتوں رات کارروائی شروع کر دی، پنجاب اسمبلی کا اجلاس جاری ہے اس میں حکومتی اتحاد اور اپوزیشن جماعتوں کے اراکین کی بڑی تعداد موجود ہے، امکان ظاہر کیا جا رہا ہے کہ اعتماد کے ووٹ کے حوالے سے کارروائی کچھ دیر میں مکمل ہو جائے گی،
فواد چوہدری، اسد عمر سمیت دیگر پی ٹی آئی رہنما بھی اسمبلی کی کارروائی دیکھنے کے لئے موجود ہیں، پی ٹی آئی کا دعویٰ ہے کہ ان کے 187 ارکان کی تعداد پوری ہے۔ واضح رہے کہ پنجاب اسمبلی میں رات گئے تک اعصاب کی جنگ جاری رہی، پنجاب اسمبلی کے اجلاس میں رات کے کھانے کیلئے کئے گئے وقفے کے دوران بھی حکومت اور اپوزیشن کی پارلیمانی پارٹیوں کے اجلاس ہوئے جس میں مرکزی رہنما سر جوڑ کر بیٹھے رہے۔پنجاب اسمبلی کے اجلاس میں جب ڈپٹی سپیکر واثق قیوم نے کرسی صدارت سنبھالی تو انہوں نے کھانے کیلئے آدھے گھنٹے کا وقفہ کا اعلان کر دیا۔حکومتی اراکین کھانے میں مصروف تھے کہ اسی دوران وزیر اعلیٰ پنجاب چودھری پرویز الٰہی بھی وہاں پہنچ گئے اور انہوں نے اراکین اسمبلی سے فرداً فرداً مصافحہ کیا۔ پی ٹی آئی کے مرکزی رہنما اسد عمر، فواد چوہدری، شاہ محمود قریشی بھی اسمبلی میں موجود تھے۔ کھانے کے وقفے کے دوران پی ٹی آئی اور مسلم لیگ (ق) کی پارلیمانی پارٹی کا مشترکہ اجلاس ہوا جس میں عدم اعتماد کے ووٹ کے حوالے سے حکمت عملی پر تبادلہ خیال کیا گیا۔ دوسری جانب پنجاب اسمبلی میں موجود وفاقی وزیر داخلہ رانا ثنا اللہ کی زیر صدارت مسلم لیگ (ن) اور پیپلز پارٹی کا اجلاس ہوا۔ اس موقع پر عطا اللہ تارڑ اور دیگر بھی موجو دتھے۔ اجلاس میں ممکنہ طور پر اعتماد کے ووٹ کی کارروائی پر نظر رکھنے کیلئے حکمت عملی مرتب کی گئی۔
