لاہور( این این آئی) پاکستان تحریک انصاف کے چیئرمین عمران خان سے پنجاب اسمبلی کے آزاد حیثیت میں منتخب ہونے والے رکن اسمبلی بلال وڑائچ نے ملاقات کی ، رکن اسمبلی نے تحریک انصاف کے وژن کی تائید اور وزیراعلی چوہدری پرویز الٰہی کو اعتماد کاووٹ دینے کا اعلان کر دیا، عمران خان سے خیبر پختوانخواہ سے تعلق رکھنے والے
اراکین اسمبلی نے بھی ملاقات کی اور آگاہ کیا کہ ان پر پارٹی چھوڑنے کے لئے دبائو ڈالا جارہا ہے ۔ ملاقات میںسینئر نائب صدر فواد چوہدری اور سینئر صوبائی وزیر میاں اسلم اقبال سمیت دیگر بھی موجود تھے ۔ فواد چوہدری نے بتایا ک ہ آزاد حیثیت میں منتخب ہونے والے بلال وڑائچ نے خان سے ملاقات کر کے پرویز الٰہی کو اعتماد کا ووٹ کا ووٹ دینے کی یقین دہانی کرائی ہے ۔ بلال وڑائچ اس سے قبل حمزہ شہباز کے کیمپ میں موجود تھے اور ان کو ووٹ دیا تھا،بلال وڑائچ نے عمران خان سے ملاقات کے بعد تحریک انصاف کے وژن پر مکمل اعتماد کا اظہار کیا ہے ،وڑائچ فیملی بہت جلد تحریک انصاف میں باقاعدہ شمولیت اختیار کر رہی ہے۔ انہوں نے کہا کہ بلاول وڑائچ کے آنے سے پنجاب اسمبلی میں ہمارے مزید 1 ووٹ کا اضافہ ہو گیا ہے۔بلال وڑائچ نے تحریک انصاف کے نظریے پر عمل پیرا ہونے کے عزم کا اظہار کرتے ہوئے کہا کہ میرے لئے خوش آئند بات ہے کہ تحریک انصاف میں شامل ہو رہا ہوں،انشااللہ عمران خان کے وژن کے مطابق سیاست کریں گے،تحریک انصاف کے نظریے کو اپناتے ہوئے وزیر اعلی پرویز الٰہی کو ہی ووٹ دوں گا،تحریک انصاف کی تمام قیادت کا خوش آمدید کہنے پر تہہ دل سے شکر گزار ہوں۔علاوہ ازیں عمران خان سے خیبر پختوانخواہ کے اراکین اسمبلی نے ملاقات کی ۔ ارکان اسمبلی نے کہا کہ پارٹی چھوڑنے کے لئے دبائو ڈالا جارہا ہے ، پارٹی چھوڑنے سے متعلق کالز موصول ہو رہی ہیں ۔
اراکین اسمبلی نے عمران خان کو بتایا کہ پارٹی چھوڑنے کے بدلے میں متعدد پیشکش کی جارہی ہیں ، ہمیں کہا جارہا ہے کہ 40اراکین توڑ لئے گئے ہیں ، ہمیں کہا گیا کہ تحریک انصاف ختم ہو رہی ہے ۔عمران خان نے اراکین کو تسلی دیتے ہوئے کہاکہ آپ فکر نہ کریں سب ٹھیک ہو جائے گا۔ اراکین اسمبلی نے عمران خان کو خیبر پختوانخواہ کے دورے کی بھی دعو ت دی ۔
