کراچی(این این آئی)کراچی میں سہراب گوٹھ الآصف اسکوائر کی مارکیٹ میں پولیس اور سادہ لباس افراد کی جانب سے چیکنگ کے بہانے دکانداروں سے لوٹ مار کی گئی، واقعہ کی سی سی ٹی وی بھی منظرعام پر آگئی ہے ۔سہراب گوٹھ الآصف اسکوائر کی مارکیٹ میں پولیس کے ساتھ سادہ لباس افراد کی جانب سے چیکنگ کے بہانے دکانداروں کو تنگ کرنے پر دکانداروں نے احتجاج کیا۔دکانداروں کے مطابق گزشتہ روز 2 پولیس اہلکاروں کے ساتھ 2 سادہ لباس افراد آئے، سادہ لباس افراد نے پولیس کے ساتھ دکانداروں کی تلاشی لی۔تلاشی کے دوران جس کی جیب میں جتنے پیسے تھے اہلکاروں نے لوٹ لیے، بہت سے دکانداروں کی جیب میں موجود نقد رقم اہلکار لے گئے۔پولیس سے رابطہ کرنے پر واقعہ پر روایتی لاعلمی کا اظہار کیا گیا ہے، پولیس حکام کے مطابق ہمیں اس معاملے کا علم نہیں۔پولیس نے موقف اپنایاکہ الآصف اسکوائر کی مارکیٹ سے کوئی بھی دکاندار شکایت لیکر نہیں آیا ہے۔