مونس الٰہی کے مبینہ فرنٹ مینوں کیخلاف ایف آئی اے انکوائری شروع۔پنجاب اسمبلی کے نائب قاصد قیصر، ارم امین اور ارشد اقبال کے اکائونٹس سے مشکوک ٹرانزیکشنز ہوئیں
تینوں افراد کے بینک اکائونٹس کی تفصیلات انکے پروفائل سے مطابقت نہیں رکھتی ،ارم امین مونس الٰہی کی کمپنی میں کام بھی کرتی ہیں۔
لاہور ( این این آئی) وفاقی تحقیقاتی ادارے (ایف آئی اے ) نے مسلم لیگ (ق) کے مرکزی رہنما و سابق وفاقی وزیر مونس الٰہی کے مبینہ فرنٹ مینوں کے خلاف انکوائری شروع کردی۔ذرائع کے مطابق ایف آئی اے نے سابق وفاقی وزیر مونس الٰہی کے مبینہ فرنٹ مینوں پنجاب اسمبلی کے نائب قاصد قیصر، ارم امین اور ارشد اقبال کے خلاف انکوائری کا آغاز کردیا ہے۔تینوں افراد کے خلاف انکوائری کا آغاز ان کے اکائونٹس میں مشکوک ٹرانزیکشنز کی بنیاد پر کیا گیا ہے۔ ایف آئی اے ذرائع کے مطابق ارم امین مونس الٰہی کی کمپنی میں کام بھی کرتی ہیں۔پنجاب اسمبلی کے نائب قاصد قیصر، ارم امین اور ارشد اقبال کے اکائونٹس سے مونس الٰہی اور فیملی کے دیگر افراد کے اکائونٹس میں پیسے منتقل ہوئے ۔ اس سلسلے میں ایف آئی اے ذرائع کا کہنا ہے کہ تینوں افراد کے بینک اکائونٹس کی تفصیلات ان کے پروفائل سے مطابقت نہیں رکھتی ہیں۔واضح رہے کہ مونس الٰہی کے خلاف عدالت میں جمع منی لانڈرنگ کیس میں بھی تینوں افراد کا ذکر ہے ۔
