اسلام آباد (این این آئی)سابق رکن قومی اسمبلی عائشہ گلالئی وزیر نے عمران خان پر بہن کے ہسپتال پر حملہ کروانے کا الزام لگا دیا۔ میڈیا سے گفتگو میں عائشہ گلالئی نے کہا کہ عمران خان نے میری بہن کے اسپتال پر اپنے کونسلروں کے ذریعے حملہ کروایا۔انہوں نے کہا کہ حملہ آور ہسپتال سے ہمارے کروڑوں روپے کے میڈیکل آلات لے کر چلے گئے، اس معاملے میں ڈی پی او نے بھی تعاون کرنے سے انکار کردیا ہے۔سابق رکن قومی اسمبلی نے کہا کہ خیبر پختونخوا دراصل سری لنکا بن چکا ہے، صوبے کو کوئی قرض بھی نہیں دیتا، دوسری طرف دہشت گردی دوبارہ سر اٹھا رہی ہے۔انہوں نے کہاکہ پی ٹی آئی دہشت گردی کو سپورٹ کرتی ہے، سپریم کورٹ سے مطالبہ ہے کہ عمران خان کی سیاست پر تاحیات پابندی لگائی جائے۔عائشہ گلالئی نے کہا کہ عمران خان نے منہگائی کی سونامی لاکر عوام سے بدلہ لیا۔