کراچی(آئی این پی)کراچی آج سے سردی کی لہر کی لپیٹ میں رہے گا اور رات کے وقت اکثر علاقوں میں درجہ حرارت سنگل ڈیجٹ میں آسکتا ہے۔موسمیاتی تجزیہ کار کے مطابق شہر میں دن کے وقت درجہ حرارت 25 ڈگری سینٹی گریڈ تک رہنے کا امکان ہے جبکہ مضافاتی علاقوں میں صبح اور رات کے

اوقات میں درجہ حرارت 7 سے 8 ڈگری تک جا سکتا ہے۔موسمیاتی تجزیہ کار کا بتانا ہے کہ ملیر، سرجانی ٹاؤن اور گلشن معمار میں درجہ حرارت 8 سے 9 ڈگری تک گرسکتا ہے، اس کے علاوہ مغربی ہواؤں کا ایک اور سلسلہ بلوچستان کے راستے اثرانداز ہو سکتا ہے۔موسمیاتی تجزیہ کار کے مطابق مغربی سسٹم سے 28 دسمبر سے بلوچستان میں بارشیں اور برفباری متوقع ہے جبکہ ساحلی علاقوں میں بھی بارشوں کا امکان ہے، حب اور گڈانی میں بارش جبکہ کراچی میں بوندا باندی کا امکان رہے گا۔موسمیاتی تجزیہ کار کی جانب سے یہ بھی بتایا گیا ہے کہ سندھ میں بھی موسم سرد رہنے کا امکان ہے، سندھ کے اکثر علاقوں میں پارا 4 سے 5 ڈگری سینٹی گریڈ تک گر سکتا ہے، بالائی سندھ میں دھند کا بھی امکان ہے جس کے باعث دن میں بھی موسم سرد رہے گا۔ موسمیاتی تجزیہ کار کے مطابق 28 دسمبر سے یکم جنوری تک مغربی ہواؤں کا سسٹم ملک پر اثر اندازرہیگا۔