میرپور (این این آئی)نامور بھارتی کرکٹر ویرات کوہلی بنگلہ دیش کے خلاف میرپور ٹیسٹ کی دوسری اننگز میں صرف ایک رن پر آؤٹ ہونے کے بعد بنگلادیشی کھلاڑیوں سے الجھ پڑے۔ میرپور ٹیسٹ میں بنگلہ دیش کے 145 رنز کے ہدف کے تعاقب میں بھارت کی ٹیم 45 رنز پر 4 اہم وکٹوں سے محروم ہوگئی۔ آؤٹ ہونے والے کھلاڑیوں میں صف اول کے بلے باز ویرات کوہلی بھی شامل ہیں، جو اس اننگز میں 22 گیندیں کھیل کر صرف ایک ہی رن بناسکے۔ سوشل میڈیا پر ویرات کوہلی کے آؤٹ ہونے اور اس کے بعد کوہلی اور بنگلہ دیشی کھلاڑیوں کے درمیان ہوئی تکرار کی ویڈیو بھی وائرل ہوگئی۔آؤٹ ہونے کے بعد ویرات کوہلی بنگلہ دیشی کھلاڑیوں سے الجھ پڑے جس کے بعد امپائرز نے درمیان میں آکر اس معاملے کو قابو کیا۔