لاہور( آن لائن ) پاکستان تحریک انصاف کے مرکزی رہنما فواد چوہدری نے کہا ہے کہ عدالت نے جو بیان حلفی لیا پی ٹی آئی اْس سے اتفاق نہیں کرتی، لاہور ہائیکورٹ کو گیارہ جنوری تک اسمبلیاں تحلیل نہ کرنے کی یقین دہانی کرائی ہے، سلیکٹیڈ گورنر منتخب وزیراعلیٰ کو گھر نہیں بھیج سکتے۔
لاہور ہائی کورٹ کے باہر میڈیا سے گفتگو کرتے ہوئے فواد چوہدری نے کہا کہ عدالت میں ہمارا مؤقف درست ثابت ہوا اور لاہور ہائیکورٹ نے گورنر کا وزیراعلیٰ کو ڈی نوٹیفائی کرنے کا حکم نامہ معطل کردیا، عدالتی فیصلے کے مطابق گورنر مس کنڈیکٹ کے مرتکب ہوئے۔انہوں نے کہا کہ امید ہے چیف سیکریٹری آکر بتائیں گے کہ انہیں نوٹی فکیشن جاری کرنے کیلیے کس نے مجبور کیا اور نوٹی فکیشن کس نے جاری کروایا، گورنر کے غیرآئینی اقدام کو عدالت نے مسترد کردیا۔فواد چوہدری نے کہا کہ عدالت نے جو بیان حلفی لیا پی ٹی آئی اْس سے اتفاق نہیں کرتی، ہم نے بیان حلفی دیا کہ آئندہ سماعت تک اسمبلی تحلیل نہیں کریں گے، اسمبلیاں ہر صورت تحلیل ہوں گی چاہیے ایک ہفتے یا دو دن میں ہوں، ہم بیان حلفی کے حق میں نہیںتھے، عدالت کے کہنے پر ہی دیا۔عدالت کی انڈرٹیکنگ سے اتفاق نہیں کرتے ۔ انہوں نے کہاکہ آصف علی زردار بیگ لے کر لاہور میں بیٹھ گئے اب یہ نہیں چلے گا ہم اعتماد کا ووٹ لینے کیلئے تیا رہیں ہمارے کچھ ارکان بیرون ملک ہیں ان کے اعتماد کے ووٹ کا شوق پورا کریں گے سلیکٹیڈ گورنر منتخب وزیراعلیٰ کو گھر نہیں بھیج سکتے ۔ انہوں نے مزید کہاکہ اسپیکر کے خط پر صدر مملکت کاروائی شروع کریں۔
