اسلام آباد (این این آئی) سربراہ جے یو آئی (ف)وپی ڈی ایم کے سربراہ مولانا فضل الرحمن نے کہا ہے کہ پنجاب کا اگلا وزیراعلی کون ہوگا، فی الحال کچھ نہیں کہا جاسکتا، پرویزالٰہی نے وزارت اعلی کے مواقع ضائع کئے۔ اب دیکھنا ہوگا کہ پی ڈی ایم پرویزالٰہی پر اعتماد کرے گی یا نہیں۔

نجی ٹی وی سے گفتگو کرتے ہوئے مولانا فضل الرحمن نے کہا عمران خان اسمبلیاں توڑ بھی دیں تو کوئی سیاسی ہیجان پیدا نہیں ہوگا، پنجاب اور کے پی اسمبلی توڑی گئی تو عمران خان کا خانہ خراب ہوجائے گا، پنجاب میں تبدیلی کا فائدہ پی ڈی ایم کو ہوگا۔انہوں نے کہا کہ جنرل باجوہ نے وردی اتار دی تو عمران خان شیر بن گئے ہیں، جب ابے نے عاق کردیا تو نکہ شیر بن گیا، ایک وقت تھا یہ جنرل باجوہ کی خوشامد کرتے تھے۔ انہوں نے کہا کہ عمران خان خود کہتے ہیں فیصلے ادھر ہوتے تھے تو اس کا مطلب وہ خود ڈمی تھے ، باجوہ صاحب اس نتیجے پر پہنچے کہ یہ آدمی کام کا نہیں۔انہوں نے کہا کہ عمران خان کی حمایت کرنیوالی بین الاقوامی اسٹیبلشمنٹ کو بھی اب سوچنا چاہئے۔ انہوں نے کہا کہ کچھ بھی ہوجائے، الیکشن وقت پر ہوں گے۔انہوں نے کہا کہ پرویزالٰہی نے پی ٹی آئی کی گود میں بیٹھ کر حکومت بنائی، اب لڑائی ہوگئی، (ن )لیگ کو پنجاب میں کلیدی سیاسی عہدے کا سوچنا ہوگا۔