لاہور( این این آئی)پاکستان تحریک کے چیئرمین عمران خان سے سابق وفاقی وزیر چوہدری مونس الٰہی نے ملاقات کر کے اپوزیشن کے اقدامات کے حوالے سے تبادلہ خیال کیا ۔ ملاقات میں پنجاب اسمبلی کی تحلیل کے حوالے سے حکمت عملی کو مزید موثر بنانے کے حوالے سے بھی گفتگو کی گئی ۔مونس الٰہی نے عمران خان کو پنجاب میں عدم اعتماد اور گورنر کی جانب سے اعتماد کا ووٹ لینے پر اپنی قانونی اور سیاسی رائے بھی دی ۔ ٹوئٹر پر جاری اپنے بیان میں مونس الٰہی نے کہا کہ عمران خان سے ملاقات میں پنجاب اسمبلی توڑنے کی حکمت عملی مکمل کرلی ہے۔پی ڈی ایم جتنی مرضی کوشش کر لے جلد الیکشن کو نہیں روک سکتی، اگلے الیکشن میں جیت عمران خان کی ہے۔