نیویارک(این این آئی)وزیر خارجہ بلاول بھٹو زرداری نے روس سے سستا تیل خریدنے کی دو ٹوک انداز میں تردید کردی۔میڈیا سے گفتگو کرتے ہوئے وزیر خارجہ نے کہاکہ ہم نے روس سے تیل خریدا ہے اور نہ ہی اس کی کوشش کررہے ہیں۔انہوں نے وضاحت کرتے ہوئے بتایا کہ

پاکستان میں روسی تیل کو صاف کرنے کا نظام ہی موجود نہیں جس کی وجہ سے ہم روسی تیل نہیں خرید سکتے، بھارت میں روسی تیل صاف کرنے کا نظام موجود ہے۔ انہوں نے کہا کہ ہم روس سے تیل نہیں گندم خرید رہے ہیں۔وزیر خارجہ نے کہاکہ مستقبل میں ہم کوشش کر سکتے ہیں کہ پاکستان میں روسی تیل صاف کرنے کا نظام لگا سکیں لیکن فوری طور پر اس کا کوئی امکان نہیں ہے۔ سستا تیل خریدنے سے متعلق بات کرتے ہوئے بلاول بھٹو زرداری نے کہا کہ آج کل کوئی بھی رعایتی نرخ پر تیل نہیں دیتا، سستا تیل خریدنے کی باتیں حقائق نہیں۔انہوں نے کہاکہ پاکستان توانائی سے متعلق درپیش مسائل اور ضروریات سے بھرپور انداز میں نمٹنے کی کوشش کررہا ہے۔ وزیر خارجہ نے کہاکہ روس یوکرین جنگ کے بعد یورپ نے روسی تیل اور گیس پر انحصار کیا ہے لیکن پاکستان نے نہیں،انہوں نے رعایتی نرخوں پر روس سے تیل کی خریداری کی باتوں کو ٹرک کی بتی قرار دیا۔