مردان(این این آئی)پاکستان مسلم لیگ (ن)خیبر پختونخوا کے صدر، وزیر اعظم کے مشیر انجینئر امیر مقام نے کہا ہے کہ کہ لندن ہائی کورٹ نے شہباز شریف کو صادق اور امین جبکہ عمران خان کو جھوٹا قرار دیا ہے، نوازشریف کو بیٹے سے تنخواہ کے جرم میں نااہل کر دیاگیا، عمران خان ایک نمبر جھوٹا، کرپٹ اور منی لانڈرر ثابت ہوچکا ہے، وہ 62، 63 کے تحت اب تک کیوں اہل ہے؟

کیا ایک ملک میں دو قانون، دو اصول اور دو انصاف ہوسکتے ہیں؟ اللہ تعالی نے قائد نواز شریف، شہباز شریف اور شریف خاندان کو سرخرو کیا،ڈیلی میل کی معافی عمران خان کے جھوٹے ہونے کا ثبوت اور اعلان ہے۔ وہ اتوار کو شیرگڑھ میں پاکستان مسلم لیگ (ن)کے ورکرز کنونشن اور یوم تشکر کی تقریب سے خطاب کر رہے تھے۔ امیر مقام نے کہاکہ عمران خان نے چار سال اپنے اختیارات سیاسی مخالفین کو انتقام کا نشانہ بنانے اور گھڑیاں، ہیرے، ہار چوری کرنے کیلئے استعمال کیا،پاکستان کے دوستوں کے قیمتی تحفے بھی بیچ دئیے،جو شرمندگی اور شرمساری کی بات ہے۔ انہوں نے کہاکہ عمران خان اسمبلیاں توڑو تاکہ پنجاب اور خیبرپختونخوا کے عوام کو تمہارے ظلم، کرپشن اور لوٹ مار سے ملے، پی ٹی آئی نے چار سال وفاق اور 9 سال خیبرپختونخوا کے عوام کو مسائل کی دلدل میں دھنسا دیا ہے۔ انہوں نے کہاکہ میں چوہدری پرویز الہٰی کو داد دیتا ہوں کہ انہوں نے پی ٹی آئی کو اپنے پیچھے لگالیا ہے،اب پی ٹی آئی چیئرمین چوہدری پرویز الہٰی اور مونس الہی ہیں، عمران خان عملا پی ٹی آئی کے چیئرمین کے عہدے سے فارغ ہوچکا ہے، خیبرپختونخوا والے بھی کہتے ہیں کہ پنجاب اسمبلی تحلیل ہونے تک ہم بھی خیبر پختو نخوا اسمبلی نہیں توڑیں گے۔انہوںنے کہاکہ وزیراعلیٰ خیبرپختونخوا کہتاہے کہ عمران خان کے لئے جان بھی حاضر ہے لیکن وہ ایک دستخط کرنے کو تیار نہیں۔ انجینئر امیر مقام نے کہا کہ قائد محمد نوازشریف اور شہباز شریف پاکستان کی ترقی کی ضمانت ہیں، قوم کو پہلے بھی لوڈ شیڈنگ، مہنگائی، دہشت گردی سے نجات دلائی تھی، اب پھر قوم کو ان مسائل سے نجات دلائیں گے۔