اسلام آباد (این این آئی)پاکستانی سائنسدان نے پانی سے پلاسٹک کے مائیکرو ذرات نکالنے کا طریقہ دریافت کر لیا۔محمد حارث سے ایک ایسا جادوئی پاؤڈر تیار کیا ہے جو پانی سے مائیکرو پلاسٹک کے ذرات کو کسی مقناطیس کی طرح اپنے اندر جذب کرنے کی صلاحیت رکھتا ہے، پاکستانی سائنسدان کی دریافت کو امریکا سمیت مغربی دنیا
میں بڑی کامیابی قرار دیا جا رہا ہے۔نجی ٹی وی سے گفتگو میں محمد حارث نے بتایاکہ اس کی مثال آپ اس طرح سے لے لیں کہ ایک کار پارکنگ ہے جس میں مختلف منزلیں ہیں جس کے درمیان میں آپ مختلف پلرز کھڑے کر دیتے ہیں، اسی طرح کا اسٹرکچر ہمارے مٹیریل کا بھی ہے جس کی وجہ سے زیادہ پانی بیچ میں سے گزر سکتا ہے اور زیادہ مائیکرو پلاسٹک کے ذرات اس مقناطیسی پاؤڈر کے ساتھ لگ سکتے ہیں۔مائیکرو پلاسٹک کے ذرات کو پانی سے علیحدہ کرنے کے لیے استعمال ہونے والے پاؤڈر کے صحت پر منفی اثرات سے متعلق سوال پر محمد حارث نے بتایا کہ یہ زیتون کے تیل کو استعمال کرتے ہوئے بنایا گیا ہے اور اس میں آئرن کے پارٹیکلز بھی استعمال کیے گئے ہیں، یہ ایک قسم کا نقصان نہ پہنچانے والا پاؤڈر ہے، ہم نے اپنی لیبارٹری میں اس کا تجربہ کیا ہے جو بالکل بھی نقصاندہ نہیں ہے۔محمد حارث نے کہاکہ ابھی تو ہم نے صرف تجرباتی طور پر یہ ثابت کیا ہے کہ کس طرح سے پانی سے مائیکرو پلاسٹک کے ذرات کو کامیابی کے ساتھ علیحدہ کیا جا سکتا ہے لیکن ہمارا منصوبہ ہے کہ ہم اس چیز کو آگے لیکر چلیں اور انڈسٹریز کے ساتھ مل کر بڑے پیمانے پر کام کریں۔انہوں نے بتایا کہ جب یہ خبر آسٹریلیا میں بریک ہوئی تو وہاں کے بڑے میڈیا ہاؤس نے ہمارا انٹرویو لیا اور اس تجرے کو دنیا کے 400 سے زائد ڈیجیٹل پلیٹ فارمز پر شائع کیا جا چکا ہے اور اسے مختلف زبانوں میں ترجمہ کر کے بھی شائع کیا گیا ہے۔
محمد حارث نے بتایا کہ اس وقت دنیا میں اس طرح کا جتنا بھی کام ہو رہا ہے وہ بہت ہی کم ہے، جو تھوڑا بہت دستیاب ہے وہ بھی غیر محفوظ اور بہت مہنگا ہے یا مکمل طور پر مائیکرو پلاسٹک کو صاف نہیں کرتا، اس لحاظ سے ہمارا مٹیریل ہر طرح سے بہتر ہے۔
