لاہور ( این این آئی) ملک کے سب بڑی آبادی والے صوبے پنجاب میں ہر گھنٹے میں ایک خاتون کا اِغواء اور روزانہ اوسطاً 16 خواتین کے ساتھ زیادتی کا انکشاف ہوا ہے۔آبادی کے لحاظ سے ملک کے سب سے بڑے صوبہ پنجاب بچوں اور خواتین کیلئے

خوفناک حد تک غیر محفوظ بننے لگا ہے۔نجی ٹی وی کے مطابق غیر سرکاری تنظیم کی پولیس ایف آئی آرز کی روشنی میں تیار رپورٹ میں انکشاف ہوا ہے کہ پنجاب میں ہر گھنٹے میں ایک خاتون کو اِغوا کرلیا جاتا ہے، جبکہ روزانہ اوسطاً 16 خواتین کو زیادتی کا نشانہ بنادیا جاتا ہے۔رپورٹ کے مطابق صرف ستمبر میں پنجاب میں خواتین کے اغوا کے 844 کیسز رپورٹ ہوئے جبکہ جبری جنسی زیادتی میں بھی پنجاب پہلے نمبر پر ہے اور ستمبر میں زنا بالجبر کے 491 کیس رپورٹ ہوئے اور اسی ماہ میں صوبے میں 105 خواتین قتل ہوئیں۔رپورٹ میں انکشاف ہوا ہے کہ پنجاب بچوں کیلئے بھی غیر محفوظ ہوچکا ہے، جہاں ستمبر میں بچوں سے زیادتی کے 268 کیس رپورٹ ہوئے، اس دوران 239 بچے اِغوا کرلئے گئے اور اسی ماہ 19 بچوں کو قتل بھی کردیا گیا۔