اسلام آباد (این این آئی)پاکستان تحریک انصاف کے لانگ مارچ پر روزانہ 43 لاکھ روپے خرچ ہونیکا انکشاف ہوا ہے۔ذرائع کے مطابق مارچ کے کوریج پلان پر13 لاکھ روپے روزانہ خرچ ہورہے ہیں، سیٹیلائٹ سے انٹرنیٹ اور ڈی ایس این جیز کے ذریعے کوریج ہورہی ہے اورلاہور کے نامعلوم مقام پر لائیو ٹرانسمیشن کا سسٹم لگاکردکھایاجارہاہے۔ذرائع کے مطابق 2 سائونڈسسٹمزپر5لاکھ، جنریٹرز کے دو ٹرکوں پرروزانہ 3لاکھ خرچ ہورہے ہیں، سکیورٹی، آپریشنز اسٹاف، بینرز، بل بورڈز، ٹرانسپورٹ پرروزانہ 10 لاکھ روپے کا خرچہ آرہا ہے۔ذرائع کے مطابق لانگ مارچ کے پانچویں روز تک 2کروڑ 15 لاکھ خرچ ہو چکے، 7 روز کی میڈیاکوریج کے سیٹیلائٹ سسٹم کیلئے سواکروڑ روپے طے ہوئے تھے، لانگ مارچ ایک ہفتہ بڑھانے سے اخراجات بھی ڈبل ہو جائیں گے۔